மதுக்கூர் மேம்படுத்தப்பட்ட அரசு ஆரம்ப சுகாதார நிலையத்திற்கு இரவு நேரமருத்துவர்கள் நியமிக்க மமகவினர் மாவட்ட ஆட்சி தலைவரை சந்தித்து கோரிக்கை..

மதுக்கூர் மேம்படுத்தப்பட்ட அரசு ஆரம்ப சுகாதார நிலையத்தில் இரவு நேர மருத்துவர்கள் பணி அமர்த்த கோரி இன்று மாவட்ட ஆட்சி தலைவரை மனிதநேய மக்கள் கட்சியினர் சந்தித்து மனு கொடுத்து உள்ளனர்.

இக்கோரிக்கை மிக முக்கியமானது எனவும் அவசியமானது எனவும் பலதரப்பு மக்களின் எதிர்ப்பார்ப்பு எனவும் சமூக ஆர்வலர்கள் கருத்து.

இச் சந்திப்பில் மமக மதுக்கூர் நகர செயலாளர் ராசிக் அகமது, துனை செயலாளர் சபீர் அகமது, தமுமுக மாவட்ட துணை செயலாளர் ஜபருல்லா ஆகியோர் கலந்து கொண்டனர்.

 

 

பாதுகாப்பானதா கூடங்குளம் உலை?

அணுஉலை விஷயத்தில் தமிழக அரசின் செயல்பாடு, தமிழக மக்களின் கண்களாக இருக்க வேண்டும்

இந்தியப் பிரதமர் நரேந்திர மோடி, ரஷ்ய அதிபர் விளாடிமிர் புதின், தமிழக முதல்வர் ஜெ.ஜெயலலிதா மூன்று தலைவர்களும், காணொளி மூலம் கூடங்குளம் அணுஉலையின் அடுத்தடுத்த அலகுகளை இந்திய நாட்டுக்கு அர்ப்பணித்திருக்கின்றனர். அணுசக்தி தேவையா, தேவையில்லையா எனும் விவாதத்தில் இருவேறு கருத்துகளுக்கு இடம் இருக்கலாம்; பாதுகாப்பு ஏற்பாடுகளில் அப்படி இருவேறு கருத்துகளுக்கு இடம் இருக்க முடியாது.

தமிழக முதல்வர் ஜெயலலிதா இந்நிகழ்ச்சியில் பேசுகையில், “கூடங்குளம் அணுஉலை குறித்து மக்களின் சந்தேகங்களைப் போக்க நிபுணர் குழு அமைக்கப்பட்டது. மக்களின் அச்சங்களைப் போக்க அரசு நடவடிக்கை எடுத்தது. கூடங்குளம் அணுஉலை உயர் பாதுகாப்பு அம்சங்கள் கொண்டது. கூடங்குளத்தைச் சுற்றியுள்ள பகுதி மக்களின் வளர்ச்சிக்கு தமிழக அரசு உறுதுணையாக உள்ளது” என்றெல்லாம் பேசியிருக்கிறார். இதே ஜெயலலிதா, கடந்த 2013 அக்டோபர் 13 அன்று, தூத்துக்குடியில் உள்ளாட்சித் தேர்தல் பிரச்சாரக் கூட்டத்தில் பேசும்போது “கூடங்குளம் அணுமின் நிலையத்தைப் பொறுத்தவரை, உள்ளூர் மக்களின் கருத்துகளுக்கு மதிப்பளிக்கும் வகையில் தமிழக அரசு நிச்சயம் செயல்படும். இந்தப் பிரச்சினையில் உங்களில் ஒருத்தியாக நான் இருப்பேன்” என்று குறிப்பிட்டது இங்கு நாம் நினைவில் கொள்ள வேண்டியது. இத்தகைய பின்னணியில் முதல்வர் ஜெயலலிதா தன்னுடைய சமீபத்திய உரையில் குறிப்பிட்டிருக்கும் ‘பாதுகாப்பு உறுதி’ எந்த அளவுக்கு உண்மையானது?

கள யதார்த்தம்

இந்திய அணுசக்தி ஒழுங்காற்று வாரியம் 1989-ம் ஆண்டிலேயே “கூடங்குளம் அணுஉலையிலிருந்து வரக்கூடிய அணுக் கழிவுகளை அணுஉலை பக்கத்திலேயே சேமிக்காமல், தொலைதூரத்தில் சேமிக்க வழி காண வேண்டும்” என்று கூறியுள்ளது. 2013-ல் உச்ச நீதிமன்றமும்கூட இதை நடைமுறைப்படுத்த வேண்டியதன் அவசியத்தை வலியுறுத்தி உத்தரவிட்டது. ஆனால், இன்றுவரை நடக்கவில்லை. ‘‘உச்ச நீதிமன்றத்தின் பரிந்துரைகளில் இரு பரிந்துரைகளை நிறைவேற்ற நீண்ட காலம் தேவைப்படும்’’ என்று அணுசக்தித் துறை உச்ச நீதிமன்றத்தில் தெரிவித்துள்ளது. நிறைவேற்றப்படாத இந்த இரண்டு பரிந்துரைகளும் அணுஉலையில் உள்ள ரியாக்டரின் பாதுகாப்பு அம்சங்கள் தொடர்பானவை. இத்தகைய பாதுகாப்பு அம்சங்களை நடைமுறைப்படுத்த உரிய நடவடிக்கைகள் இதுவரை எடுக்கப்படவில்லை.

நான் பல முறை சட்டமன்றத்தில் கோரிக்கை வைத்தேன், ‘‘தமிழக அரசு அமைத்ததாகக் கூறும் நிபுணர் குழுவின் அறிக்கையைச் சட்டமன்றத்தில் தாக்கல் செய்ய வேண்டும்’’ என்று. இதுநாள் வரை தாக்கல் செய்யப்படவில்லை. என்ன காரணம்? கூடங்குளம் அணுஉலையை எதிர்த்துப் போராடும் மக்களிடம் அந்தக் குழு எவ்விதக் கருத்துக்கேட்பு நிகழ்ச்சியையும் நடத்தவில்லை; மக்களின் அச்சங்களைப் போக்கும் எந்தவொரு நடவடிக்கைகளிலும் யாரும் ஈடுபடவில்லை. கூடங்குளம் மற்றும் அதைச் சுற்றி வாழும் மக்களுக்குப் பேரிடர் மேலாண்மைப் பயிற்சி எதுவும் இந்நாள் வரை அளிக்கப்படவில்லை. அணுஉலையில் விபத்து ஏற்பட்டால் பாதிக்கப்பட்ட மக்களுக்குச் சிகிச்சை அளிக்க அருகில் ஒரு பன்னோக்கு மருத்துவமனைகூட அமைக்கப்படவில்லை. இப்படிப்பட்ட நிலையில் முதல்வர் ஜெயலலிதாவின் பேச்சு எந்த அளவுக்கு உண்மைச் சூழலைப் பிரதிபலிக்கிறது?

பாதுகாப்பு ஓட்டைகள்

2014 அக்டோபரில் கூடங்குளம் அணுஉலையில் உள்ள முதல் அலகில் டர்பைன் என்று சொல்லக்கூடிய விசையாழியின் கத்திகள் உடைந்து, அவ்விசையாழிகள் கடுமையாகச் சேதமாகியுள்ளன என்று தகவல்கள் வெளியாயின. இதற்குச் சில மாதங்களுக்கு முன்பு அணுஉலையின் வால்வில் ஏற்பட்ட வெடிப்பின் காரணமாக ஆறு ஊழியர்கள் பலத்த காயத்துக்கு இலக்கானார்கள் என்ற தகவல் வெளியானது. ஜூலை 2013-ல் கூடங்குளம் அணுஉலையின் முதல் அலகு செயல்பாட்டுக்கு வந்ததாக அறிவிக்கப்பட்ட பிறகும்கூட, ஏறத்தாழ ஒன்றரை ஆண்டு காலம் அரைகுறையாகவே செயல்பட்டுவந்தது. இந்த இரண்டு வருடங்களில் கூடங்குளம் அணுஉலை பழுதடைந்து 32 முறை இயக்கம் நின்றிருக்கிறது என்கிறார்கள்.

இந்திய அணுசக்தி நிறுவனத்தின் முன்னாள் தலைவர் கோபாலகிருஷ்ணன், “கூடங்குளம் அணுஉலையில் நிறுவப்பட்டுள்ள இயந்திரங்கள் மற்றும் பாகங்கள் தரமற்றவை” என்று பகிரங்கமாக அறிவித்தார். “கூடங்குளம் அணுமின் நிலையம் பாதுகாப்பற்ற நிலையில் உள்ளது” என்றும் “அணுஉலை உபயோகத்துக்கு ஊழல்கள் நிறைந்த ரஷ்ய நிறுவனங்களிடமிருந்து வாங்கப்பட்ட அனைத்தும் தரமற்ற கருவிகள்” என்றும் “உடனே அலகு மூன்று மற்றும் நான்கைத் தொடங்குவதற்கான பணிகளை நிறுத்த வேண்டும்” என்றும் இந்திய கடற்படையின் முன்னாள் தளபதி அட்மிரல் ராம்தாஸ் தலைமையிலான குழு பிரதமர் நரேந்திர மோடிக்குக் கடிதம் அனுப்பியது.

விஸ்வநாதனின் சப்பைக்கட்டு

சட்டமன்ற உறுப்பினராக இருந்தபோது, கூடங்குளம் அணுஉலையின் செயல்பாடுகள் தொடர்பாக ஆகஸ்ட் 7, 2014 அன்று நான் சில முக்கியமான குறைகளைச் சுட்டிக்காட்டினேன். அதற்குப் பதிலளித்த அன்றைய எரிசக்தித் துறை அமைச்சர் நத்தம் விஸ்வநாதன், “சந்தேகப்படுவதற்கோ அல்லது ஐயமுறுவதற்கோ ஏதுமில்லை” என்று சப்பைக்கட்டு கட்டினார்.

அக்டோபர் 23, 2013 அன்று கூடங்குளம் அணுஉலை மின்இணைப்பில் சேர்க்கப்பட்டது முதல் 840 நாட்களில் 372 நாட்கள் மட்டுமே இயங்கியுள்ளது என்பது தமிழக முதல்வரின் கவனத்துக்கு வரவில்லையா அல்லது தெரிந்தும் மறைக்கிறாரா?

கூடங்குளம் அணுசக்தி நிலையத்தைச் சுற்றியுள்ள 30 கி.மீ. சுற்று எல்லையில் 10 லட்சம் மக்கள் வாழ்கிறார்கள். அணுஉலையில் விபத்து ஏற்பட்டால், இந்த மக்களை வெளியேற்றிக் காப்பாற்றுவதற்கு உருப்படியான திட்டம் ஏதும் அரசிடம் இருப்பதாகத் தெரியவில்லை. தமிழக மக்களின் பாதுகாப்பு மற்றும் வாழ்வுரிமை சம்பந்தப்பட்ட அளவில், இந்த அணுஉலையின் பாதுகாப்புத் தன்மை கேள்விக்குறியாகவே உள்ளது. உலகிலேயே மிக அதிக பாதகமான விளைவுகளை ஏற்படுத்தக் கூடியவை அணுஉலை விபத்துகள்தான். மேலை நாடுகளில் இவற்றைக் கண்காணிப்பதற்குச் சுயேச்சை அதிகாரமுள்ள அமைப்புகள் உள்ளன. இந்தியாவில் அப்படி எதுவும் இல்லை. எனவே, அணுஉலைகளின் பாதுகாப்பு என்பது மர்மமான இரும்புத் திரையாகவே உள்ளது.

மத்திய - மாநில அரசுகள் வளர்ச்சி என்ற மந்திரச் சொல்லால் எல்லோர் வாய்களையும் அடைத்துவிட முடியாது. கூடங்குளம் அணுஉலை இந்திய அணுசக்தித் துறையின் பெருமிதங்களில் ஒன்றாக இருக்கலாம். ஆனால், தமிழகத்தைப் பொறுத்த அளவில் அது பல்லாயிரக்கணக்கான தமிழர்களின் உயிராதாரப் பிரச்சினை. கூடங்குளம் அணுஉலையில் அடுத்தடுத்த அலகுகளை விரிவாக்கும் முன் உரிய முன்னெச்சரிக்கை நடவடிக்கைகளையும் முழுமையான பாதுகாப்பு நடவடிக்கைகளையும் எடுப்பது முக்கியம். இந்த விஷயத்தில் தமிழக அரசின் செயல்பாடு தமிழக மக்களின் கண்களாக இருக்க வேண்டுமே ஒழிய; மத்திய அரசின் வாயாக ஒலிக்கக் கூடாது!

கட்டுரையாளர் - மனிதநேய மக்கள் கட்சியின் தலைவர்,

தொடர்புக்கு: jawahirinfo@gmail.com

மதுக்கூரில் மதுக்கடை முற்றுகை தற்காலிகமாக நிறுத்தம்

மதுக்கூர் முக்கூட்டுச்சாலை அதிரை ரோட்டில் பள்ளி,கல்லூரி மாணவ,மாணவிகள்,பொது மக்களுக்கு மிகவும் இடையூறாக குடியிருப்பு பகுதியில் இருக்கின்ற அரசு மதுபானக்கடையை (டாஸ்மாக் கடை எண் : 7870) அகற்றக்கோரி இன்று 14/08/2016 மாலை மனிதநேய மக்கள் கட்சியின் சார்பாக மாநில தலைவர் பேராசிரியர் ஜவாஹிருல்லாஹ் அவர்கள் கலந்து கொள்ளும் ஆர்ப்பாட்டம் அறிவிக்கப்பட்டு  பின்னர் முற்றுகைப்போராட்டமாக மாற்றியமைக்கப்பட்டது.இதன் காரணமாக இன்று காலை முதலே பரபரப்புடன் மதுக்கூர் காணப்பட்டது.காவல் துறை தீவிர கண்காணிப்புகளிலும் ஈடுபட்டனர்.

நேற்றுவரை மெத்தனமாக இருந்த அரசு நிர்வாகம்.மதுக்கூரில் நடைபெறும் மதுக்கடை முற்றுகை போராட்டத்திற்கு டெல்டா மாவட்டத்தின் பல்வேறு பகுதிகளிலுருந்து மனிதநேய சொந்தங்கள்,தமுமுக செயல்வீரர்கள் கலந்து கொள்ள இருப்பதாக உளவுத்துறை தகவலை அடுத்து இன்று மதியம் 1:00 மணியளவில் போராட்டம் வேண்டாம் பேச்சுவார்த்தை மூலமாக தீர்வு ஏற்படுத்தலாம் என்று அரசு துறை சமாதான முயற்சிகள் மேற்கொண்டதின் பெயரில் பேச்சுவார்த்தை நடைபெற்றது.
அமைதி பேச்சுவார்த்தையில் மூன்று மாதத்திற்குள்ளாக முக்கூட்டுச்சாலை மதுக்கடை இடமாற்றம் செய்யப்படும் என எழுத்துபூர்வமாக கொடுத்ததின் பெயரில் இன்று நடைபெறுவதாக இருந்த மதுக்கூர் முக்கூட்டுச்சாலை மதுக்கடை முற்றுகைப்போராட்டம் தற்காலிகமாக நிறுத்திவைக்கப்படுகின்றது.

பேச்சுவார்த்தையில் கலந்துகொண்டவர்கள்.
அரசு தரப்பு :பட்டுக்கோட்டை வட்டாட்சியர்,மாவட்ட டாஸ்மாக் உதவி மேலாளர்,பட்டுக்கோட்டை கோட்ட கலால் அலுவலர்,மதுக்கூர் காவல் ஆய்வாளர்,கிராம அதிகாரி ஆகியோர்,

தமுமுக & மமக தரப்பு : மமக மாவட்ட செயலாளர் எம்.கபார்,நகர செயலாளர்கள் ராசிக் அகமது (மமக),பவாஸ் (தமுமுக)நகர பொருளாளர் முகம்மது இலியாஸ்,நகர துணை நிர்வாகிகள் அப்பாஸ்,புரோஸ்,முஜிபுர் ரஹ்மான்,அமீரக நிர்வாகிகள் முஜிபுர் ரஹ்மான்,நிசார் அகமது,சிராஜுதீன்,மாவட்ட துணைச்செயலாளர் ஜபருல்லா மற்றும் மனிதநேய சொந்தங்கள் கலந்துகொன்டார்கள்.

எல்லா புகழும் அல்லாஹ் ஒருவனுக்கே !

மதுக்கடையை அகற்றக்கோரி.
அறவழி ஆர்ப்பாட்டம்

மதுக்கூர் முக்கூட்டுச்சாலையில் அதிரை ரோட்டில் பொதுமக்களுக்கும்,குடியிருப்புவாசிகளுக்கும் மிகவும் இடையூறாக உள்ள அரசு மதுபானக் கடையை அகற்றக்கோரி (டாஸ்மாக் கடை எண் : 7870)தமிழ்நாடு முஸ்லி முன்னேற்றக்கழகத்தின் அரசியல் பிரிவு மனிதநேய மக்கள் கட்சியின் சார்பாக வருகின்ற 14/08/2016 ஞாயிற்றுக்கிழமை மாலை 5:00 மணியளவில் (இன்ஷா அல்லாஹ்)

மதுக்கூர் முக்கூட்டுச்சாலையில் நடைபெறும் அறவழி ஆர்ப்பாட்டத்தில் மனிதநேய மக்கள் கட்சியின் மாநில தலைவர் பேராசிரியர் எம்.எச்.ஜவாஹிருல்லாஹ் அவர்கள் கலந்து கொண்டு கண்ட உரை நிகழ்த்த உள்ளார்கள்.

மதுவுக்கு எதிராய் போராடும் போராளிகளை போராட்டக்களத்திற்கு அழைக்கின்றது.

மனிதநேய மக்கள் கட்சி
மதுக்கூர்
தொடர்புக்கு : 9715858328,85081 02036,97891 55480

மதுக்கூரில் எழுச்சியுடன் நடைபெற்ற மமக கொடியேற்று நிகழ்ச்சி

22/10/2015 மாலை 5:45 மணிக்கு மதுக்கூர் நகர எல்லையான மூத்தாக்குறிச்சி பாட்டுவானாச்சி பாலத்திலிருந்து மனிதநேய மக்கள் கட்சியின் மாநில தலைவரும்,சட்டமன்ற உறுப்பினருமான் பேராசிரியர் MH ஜவாஹிருல்லாஹ்,மாநில அமைப்பு செயலாளரும் சட்டமன்ற உறுப்பினருமான சகோதரர் A.அஸ்லம் பாட்ஷா,மாநில அமைப்பு செயலாளர் தஞ்சை IM பாதுஷா ஆகியோர் மதுக்கூர் நகர நிர்வாகிகள்,செயல்வீரர்கள்,சமூக ஆர்வலர்கள் குடைசூழ பேரணியாக அழைத்துவரப்பட்டார்கள்.

பள்ளிவாசல் தெருவில் அமைக்கப்பட்ட கொடிகம்பத்தை நகர தமுமுக பொருளாளர் பொறியாளர் இலியாஸ் அவர்கள் தலைமையில் பேராசிரியர் அவர்கள் ஏற்றிவைத்தார்.சிவக்கொல்லை,கீற்றுச்சந்தை பகுதியில் அமைக்கப்பட்ட கொடிகம்பத்தை பேராசிரியர் ஜவாஹிருல்லா அவர்கள் தலைமையில் ஆம்பூர் சட்டமன்ற உறுப்பினர் சகோதரர் அஸ்லம் பாஷா அவர்கள் ஏற்றிவைத்தார்.ஓன்வே பகுதியில் அமைக்கப்பட்ட கொடிக்கம்பத்தை பேராசிரியர் ஜவாஹிருல்லா அவர்களை முன்னிலையில்,மதுக்கூர் நகர செயலாளர் ராசிக் அவர்கள் தலைமையில் மாநில அமைப்பு செயலாளர் தஞ்சை பாதுஷா அவர்கள் ஏற்றிவைத்தார்.பேரூந்து நிலையத்தில் அமைக்கப்பட்ட கொடிக்கம்பத்தை  மாவட்ட பொருளாளரும்,பேரூராட்சி கவுன்சிலருமான கபார் தலைமையில் மாநில தலைவர் பேராசிரியர் ஏற்றிவைத்தார்.பின்னர் மதுக்கூர் நகர அலுவலகம் நுழைவு வாயிலில் அமைக்கப்பட்ட கொடிக்கம்பம் அமீரக மதுக்கூர் பொறுப்பாளர்கள் சாதிக்பாட்சா அவர்கள் தலைமையில்,அமீரக பொறுப்பாளர்கள் பைசல்,ஜிபிரில்,ஹாலீத்,ஆகியோர் முன்னிலையில் பேராசிரியர் கொடியினை ஏற்றிவைத்தார்.

கொடியேற்றும் நிகழ்ச்சி முடிந்ததும் மதுக்கூர் மார்க்கெட் பகுதியில் அமைக்கப்பட்ட மனிதநேய மக்கள் கட்சியின் நகர அலுவலகத்தை அமைப்புச்செயலாளர்கள் அஸ்லம் பாஷா,பாதுஷா, ஆகியோர் முன்னிலையில் மாநில தலைவர் பேராசிரியர் ஜவாஹிருல்லாஹ் அவர்கள் திறந்து வைத்து சிறப்பித்தார்.சட்டமன்ற உறுப்பினர்கள் இருவரும் மமக அலுவலகத்தில் கூடியிருந்தவர்கள் மத்தியில் சிற்றுரை நிகழ்த்தினார்கள்.

மதுக்கூருக்கு மனிதநேய மக்கள் கட்சியின் நிகழ்ச்சிகளில் சட்டமன்ற உறுப்பினர்கள் கலந்து கொண்டது தொண்டர்கள் மத்தியில் எழுச்சியினை ஏற்படுத்தி உள்ளது.

"எல்லா புகழும் இறைவனுக்கு"

இறுதி வெற்றி MMK.

மதுக்கூரில் மமக மாநில தலைவர் மற்றும் நிர்வாகிகள்

தஞ்சாவூர் மாவட்டத்தில் நேற்று 22/10/2015 சுற்றுப்பயணம் மேற்கொண்ட மனிதநேய மக்கள் கட்சியின் சட்டமன்ற உறுப்பினர்களும்,மாநில நிர்வாகிகளுமான பேராசிரியர் ஜவாஹிருல்லாஹ்,அஸ்லம் பாட்ஷா,மாநில அமைப்பு செயலாளர் பாதுஷாஆகியோர் நேற்று மதுக்கூருக்கு வருகை தந்தனர்.மதுக்கூர் நகர எல்லையான மூத்தாக்குறிச்சி பாலம் அருகிலிருந்து தமுமுக,மமக தொண்டர்களின் வரவேற்பை பெற்றுக்கொண்டு இருசக்கர வாகனங்கள் குடைசூழ பேரணியாக வந்தனர்.அப்போது மகரிப் தொழுகைக்கான பாங்கு சொல்லப்பட்டதை அறிந்த பேராசிரியர் தனது வாகனத்தை நிறுத்த சொல்லி பெரியப்பள்ளிவாசலில் மகரிப் தொழுகைக்காக சென்றார்.மகரிப் தொழுகை முடிந்தது சட்டமன்ற உறுப்பினர்களை மதுக்கூர் பேராசிரியரும்,முன்னாள் காதிர் முகைதீன் கல்லூரி முதல்வரும்,மகான் சேக்பரீது டிரஸ்டிகளில் ஒருவருமான அப்துல் காதர் மரைக்காயர் அவர்கள் கெளரவித்தார்கள்.மதுக்கூர் தவ்ஹீத் தர்ம அறக்கட்டளையின் டிரஸ்டி அப்துல் காசிம் அவர்களும்,பொருளாளர் அப்துல்லா அவர்களும் சட்டமன்ற உறுப்பினர்களை மரியாதை நிமிர்த்தமாக சந்தித்தனர்.

தமுமுக & மமக ஆலோசனை கூட்டம்  (17/10/2015)

************************************************************************

தஞ்சாவூர் (தெற்கு) மாவட்டம் மதுக்கூர் பேரூர் கழக தமுமுக மற்றும் மமக ஆலோசனை கூட்டம் பேரூர் கழக அலுவலகத்தில் சகோதரர் A.ஜிபிரில் தலைமையிலும்,மமக நகர செயலாளர் E.S.M.முகம்மது ராசிக்,தமுமுக பேரூர் கழக செயலாளர் A.ஃபவாஸ்,பொருளாளர் பொறியாளர் A.இலியாஸ் அமீரக பொறுப்பாளர் E.S.M.பைசல்ஆகியோர் முன்னிலையில் நடைபெற்றது.

தீர்மானம்

***************

1.கடந்த 5 வருடங்களுக்கு மேலாக அனைத்து சமுதாய மக்களுக்கும் சிறப்பான சேவையினை செய்துவரும் அவசர ஊர்தி (ஆம்புலன்ஸ்) பழுதாகி வரும் நிலையில் பொதுமக்களின் பயன்பாட்டின் நன்மையினை கருதி புதிய ஆம்புலன்ஸ் வாங்குவது.

2. பழைய ஆம்புலன்ஸை மக்களின் பயன்பாட்டிற்காக ஜனாஸா வாகனமாக பயன்படுத்தலாம் என்ற ஆலோசனை செய்யப்பட்டது.

3.வருகின்ற 22/10/2015 அன்று மதுக்கூருக்கு வருகைதரும் சமுதாயத்தின் சட்டமன்ற உறுப்பினர்கள் மாநில தலைவர் பேராசிரியர் ஜவாஹிருல்லா அவர்களையும்,மாநில அமைப்புச்செயலாளர்கள் அஸ்லம்பாஷா,தஞ்சை பாதுஷா ஆகியோருக்கு சிறப்பான வரவேற்பு கொடுத்து நகரின் முக்கிய பகுதிகளில் மனிதநேய மக்கள் கட்சியின் கொடியினை ஏற்றுவது,நகர அலுவலகம் திறப்பது .

4.நகரில் அடிக்கடி குறிப்பாக இரவு நேரங்களில் சிலபகுதிகளில் ஏற்படும் மின்வெட்டுக்கு நிரந்தர தீர்வுகோரி மின்வாரிய உயர் அதிகாரிகளுக்கு கோரிக்கை மனு கொடுப்பது

5.மதுக்கூரில் உள்ள மேம்படுத்தப்பட்ட அரசு மருத்துவமனையினை முழுமையாக பயன்படுத்திக்கொள்ள மக்களிடம் குறிப்பாக இஸ்லாமிய மக்களிடம் விழிப்புணர்வு செய்தல்.

6.அதிரையில் நடைபெறும் பெருத்திரள் பொதுக்கூட்டத்தில் ஏராளமானவர்கள் பங்கேற்பது

போன்ற தீர்மானங்கள் நிறைவேற்றப்பட்டது.

கூட்டுக்குர்பானி மற்றும் குர்பானி பிராணிகளின் தோல் குறித்த வரவு செலவு அதன் பொறுப்பாளர் சகோதரர தாஜுதீன் அவர்கள் வாசித்தார்.

நகர செயல்வீரர்கள் அனைவரும் கலந்துகொண்டார்கள்.மாட்டுக்கறி உணவு பரிமாறப்பட்டது.

மதுக்கூரில் .......தமிழகத்தில் பூரண மதுவிலக்கை அமல்படுத்தக்கோரி போராட்டம்

தமிழகத்தில் பூரண மதுவிலக்கை அமல்படுத்தவேண்டும் என்ற கோரிக்கையினை வலியுறுத்தி தமிழகமெங்கும் மக்கள் போராட்டங்களை நடத்திவருகின்றார்கள்.இன்று 04/08/2015 முழு அடைப்புக்கு மனிதநேய மக்கள் கட்சி,மதிமுக,விடுதலை சிறுத்தைகள்,அழைப்புவிடுத்து இருந்தனர்.

மதுக்கூரில் இன்று மாலை 4:45 மணிக்கு மனிதநேய மக்கள் கட்சியின் தலைமையில் ஏற்பாடு செய்து இருந்த மதுவிலக்கு கோரிக்கை பேரணி பேருந்து நிலையத்திலிருந்து புறப்பட்டு முக்கூட்டுச்சாலையில் நிறைவு பெற்று மதுவுக்கு எதிரான வலுவான கோஷங்கள் எழுப்பப்பட்டது.பின்னர் முக்கூட்டுச்சாலையில் நடைபெற்ற ஆர்ப்பாட்டத்திற்கு மனிதநேய மக்கள் கட்சியின் மாவட்ட பொருளாளர் கபார் தலைமை வகித்தார்.மமக மாநில அமைப்பு செயலாளர் ராவுத்தர்ஷா,தமுமுக ஃபவாஸ்,ஜபருல்லா,அமீரக பொருப்பாளர்கள் முகம்மது சேக் ராவுத்தர்,நிசார் அகமது,அப்துல் ஹமீது,ஜாசிம்,மாவட்ட துணைச்செயலாளர் ஜபருல்லாஹ்,மதிமுக ஒன்றிய செயலாளர் சகோதரர் கரிமுத்து,சிபிஎம்  வேதச்சலாம்,சிபிஐ பாரதிமோகன்,விடுதலை சிறுத்தைகளின் மாவட்ட செயலாளர் ந.இளந்தென்றல்,சமூக சேவகர் எபிநேசன் இன்பநாதன் உள்ளிட்டவர்கள் மதுவுக்கு எதிராக பேசினார்கள்.பேரணி,ஆர்ப்பாட்டத்தில்  ஏராளமானவர்கள் கலந்துகொண்டார்கள்.விரைவில் முக்கூட்டுச்சாலை அதிரை ரோட்டில் உள்ள டாஸ்மாக் கடையினை அப்புறப்படுத்தக்கோரி முற்றுகைப்போராட்டம் நடைபெறும் என்ற அறிவிப்புடன் முடிவு பெற்றது.

ம.ம.க. பொதுச் செயலாளர் கடிதம்

பேரன்புக்குரிய மனிதநேய சொந்தங்களே... ஏக இறைவனின் அமைதியும், சமாதானமும் உரித்தாகுக!

தரணியெங்கும் வாழும் மனிதநேய மக்கள் கட்சியின் சொந்தங்களை, இனி அடிக்கடி கடிதம் வாயிலாகவும் சந்திக்கப் போகும் பெருமகிழ்ச்சியோடு இம்மடலை வரைகிறோம். அலைகடலில் துள்ளிப் பாயும் மீன்களைப் போல; அரசியல் களத்தில் சீறிப் பாயும் மனிதநேய சொந்தங்கள் நாம்; புதிய உத்வேகத்தோடு இப்போது புறப்பட்டிருக்கிறோம்.

புதுக்குடித்தனம் செல்லும் பிள்ளையைப் போல; பொறுப்புகள் கூடிய உணர்வுகளோடும்; புது ரத்தம் பாய்ச்சப்பட்ட தெம்போடும்; நமது பயணம் திசைக் காட்டப்பட்டிருக்கிறது.

தனித்துவத்தோடும், புதிய அடையாளத்தோடும் பயணிக்கும் இவ்வேளையில் அணுகுமுறையில் நிதானம், முடிவெடுப்பதில் முதிர்ச்சி, களப்பணிகளில் துணிச்சல், வாக்குறுதிகளில் நேர்மை ஆகியவற்றை நெஞ்சில் ஏந்தி கவனமாக செயல்படுவது நமது கடமையாகும்.

சொந்தங்களே...
இந்தியா போன்ற பன்முக சமூகங்கள் வாழும் நாட்டில், சிறுபான்மையினர் ஓர் அரசியல் கட்சியை உருவாக்கி வழிநடத்துவது என்பது எளிதான காரியமில்லை. பன்முக அறிவும், பலவித அனுபவமும், அரசியல் நுட்பமும் கொண்ட தலைமையாலும்; அதற்கேற்ப பக்குவப்படுத்தப்பட்ட தொண்டர்களாலும் மட்டுமே அத்தகைய அரசியல் களத்தை வெற்றிகொள்ள முடியும். இதற்கு நேர்மாறான குணாதியங்களைக் கொண்டவர்களால் இக்களத்தில் தாக்குப்பிடிக்க முடியாது என்பதை வரலாறு நிரூபித்திருக்கிறது.

மனம்போன போக்கில் ஒரு அரசியல் கட்சியை வழிநடத்துவது என்பது ஒரு சமூகத்தையே தற்கொலைப் பாதைக்கு அழைத்துச் செல்வது போலாகிவிடும். அந்தத் தவறை நாம் அனுமதித்து விடக்கூடாது.

எனவேதான் மனிதநேய மக்கள் கட்சியின் இலக்குகளைத் தீர்மானித்து அதை செயல்படுத்துவதில் மிகுந்த நுட்பங்களைக் கையாள வேண்டியிருக்கிறது. அவையாவும் வெற்றிகளைக் குறிவைத்து நகர்த்தப்படும் திட்டங்கள் என்பது ஒருபுறம். அதேசமயம் வெற்றிகளே கிடைக்காவிட்டாலும் பரவாயில்லை; நம்மை நம்பி வரும் மக்களுக்கு வீழ்ச்சிகளை ஏற்படுத்தாதவைகளாக அவை இருக்க வேண்டும் என்ற அக்கறை மறுபுறம் என்பதும் முக்கியமாகும்.

அதாவது கொள்கை உணர்வோடு செயல்படும் அதே வேளையில் அணுகுமுறைகளில் நுட்பங்களை கையாளவேண்டி இருக்கிறது. அவ்வாறு செயல்பட்டால் தான் லட்சியங்களை எளிதாக வென்றெடுக்க முடியும் இது ஒரு சவாலான பணி என்பதில் ஐயமில்லை. ஆனால் அதை சாதிப்பதில் தான் நமது அரசியல் புத்திசாலிதனம் அமைந்திருக்கிறது.

சொந்தங்களே...
நமது இந்திய தேசம் ‘வேற்றுமையில் ஒற்றுமை’ என்ற பண்பாட்டைக் கொண்டது. நமது உரிமைகளுக்காகக் குரல் கொடுக்கும் வேளையில், அது சமூக உறவுகளை சீர்குலைக்காத அளவுக்கு கவனமாக முன்னெடுக்க வேண்டியது நமது கடமையாகும். அதனால்தான் நமது அரசியல் முன்னோடிகள் ‘உரிமைக்கு குரல் கொடுப்போம் - உறவுக்கு தோள் கொடுப்போம்’ என்றார்கள்.

இதை ஏன் குறிப்பிடுகிறோம் எனில், பொறுப்பற்ற மேடைப் பேச்சுக்கள்; வெறுப்பேற்றும் எழுத்துப் பதிவு; பொது இடங்களில் பக்குவமற்ற அணுகுமுறைகள் என சிலரின் நடவடிக்கைகள் ஒரு கட்சியை மட்டுமல்ல; ஒரு சமூகத்தையே சந்தியில் நிறுத்திவிடும். அத்தகைய பாதகங்களைத் தடுத்து நிறுத்தி; வாழும் நாட்டின் சூழலுக்கேற்ப; வாழும் கலையைக் கற்றுக்கொடுக்கும் கடமை நமக்கு இருக்கிறது. பெரும்பான்மை சமூகங்களின் அன்பையும், ஆதரவையும் தக்கவைக்கும் வகையில் சிறுபான்மையினரின் அரசியல் போக்குகள் இருந்தால்தான் நல்லிணக்கத்துடன் கூடிய வெற்றிகளை சாதிக்க முடியும். அதுதான் அரசியல் களத்திற்கும், ஜனநாயகத்திற்கும் வலிமை சேர்க்கும்.

‘அறிவாளிகளைக் கொண்ட கூட்டத்திற்கு ஆயுதங்கள் தேவை இல்லை’ என்றார் கவிஞர் இக்பால் அவர்கள். ஆசியாவின் மூளை என ரவீந்திரநாத் தாகூரால் பாராட்டுப்பெற்ற உலகக் கவிஞர் அவர். அவரது கூற்றை புரிந்து கொண்டு இந்திய சூழலில் தமிழக மனநிலையில் அரசியல் பணி புரிய ஏராளமானோர் நமக்கு தேவைப்படுகிறார்கள். சமூக நீதி, சமூக நல்லிணக்கம், சமத்துவ ஜனநாயகம் என்ற நம் கொள்கைகளை அரசியல் களத்தில் செயல்படுத்த அவர்களை நாம் தயார்படுத்த வேண்டும்.

சொந்தங்களே...
நமது கட்சியில் ‘புதிய உறுப்பினர் சேர்ப்புத் திட்டம் - 2015’ என்ற பெயரில் லட்சக்கணக்கானோரை உறுப்பினர்ளாக்கும் முயற்சியை மேற்கொண்டுள்ளோம். உழைப்பாளர்களின் சர்வதேச தினமான மே 1 அன்று இத்திட்டத்தை சென்னையில் தொடங்கியுள்ளோம். மே, ஜூன், ஜூலை ஆகிய மூன்று மாதங்கள் நமது ஓய்வறியா உழைப்பின் மூலம் நமது பலத்தை பன்மடங்கு பெருக்கிக் கொள்ளப் போகிறோம்.சுவரெழுத்துக்கள், சுவரொட்டிகள், துண்டுப்பிரசுரங்கள், வாகன ஊர்வலங்கள், கொடியேற்று நிகழ்ச்சிகள், பொதுக்கூட்டங்கள், கருத்தரங்குகள், வீடு-வீதி சந்திப்புகள், தனிநபர் உரையாடல்கள், சமூக இணையதளங்கள் வழியாகப் பரப்புரைகள், தொலைக்காட்சி - வானொலி விளம்பரங்கள், காணொலி காட்சிகள் என எல்லா வடிவங்களையும் பயன்படுத்தி ‘களங்கள் யாவையும் கையிலெடுப்போம் - பாயும் திசையைத் தீர்மானிப்போம்’ என்ற முழக்கத்தோடு இப்பணிகள் திட்டமிடப்பட்டிருக்கிறது.

இதோ... எப்போது உத்தரவு வரும்? என காத்திருந்த படை வீரர்களைப் போல நம் மனிதநேய சொந்தங்கள் களத்தில் ஓடத் தொடங்கி விட்டார்கள். மே மாதம் முழுக்க இத்திட்டத்தின் தொடக்கவிழா நிகழ்ச்சிகள் திருவிழாக்களைப் போல நடத்தப்பட உள்ளன. தலைமை நிர்வாகிகள் அனைவரும் ‘எமர்ஜென்சி’ நிலையில் இயங்கத் தொடங்கி விட்டார்கள். நிகழ்ச்சிகளுக்கு நேரம் ஒதுக்க முடியாத அளவுக்கு அவர்களது நேரம் நெருக்கடிகளால் நிரம்பி வழிகிறது.

புதிதாக அறிவிக்கப்பட்ட உற்சாகத்தில் மாவட்டச் செயலாளர்கள் தளபதிகளாக ஊர், ஊராக ஓடிக் கொண்டிருக்கிறார்கள். ஒரு மாவட்டத்திற்கு 10 ஆயிரம் பேரைக் குறிவைத்து அவர்களது ஓட்டம் தீர்மானிக்கப்பட்டிருக்கிறது. தமிழகம் மற்றும் புதுச்சேரி மாநிலங்களில் சுவர்களில் விளம்பரங்கள் மின்னத் தொடங்கி விட்டன.

நமது உற்சாகமான செயல்பாடுகளைப் பார்த்து தாய்க்கழகமாம் தமுமுக பூரிப்படைகிறது. தாய்க்கழக மாவட்டச் செயலாளர்கள் நம்மைத் தொடர்புகொண்டு ‘உங்கள் பணிகளுக்கு எந்த மாதிரியான ஒத்துழைப்புகள் வேண்டும்? நாங்கள் பின்னால் இருந்து ஒத்துழைக்கிறோம்’ என கூறுகிறார்கள். நாம் அங்கு இல்லையே... நமது பெயர் இல்லையே... என்றெல்லாம் குறுகிய பார்வையோடு சிந்திக்காமல், நமது பிள்ளையான மமக சிறப்பாக செயல்பட வேண்டும் என்ற ஆவலை அவர்கள் வெளியிடுவதும், அதுபோல நடந்துகொள்வதும் நமது குடும்ப உறவை எடுத்துக் காட்டுகிறது. இதைப் புரிந்துகொண்டு பக்குவமாக செயல்படுவது நம் முதிர்ச்சியை வெளிக்காட்டும் என்பதை நினைவில் கொள்ள வேண்டும்.

சொந்தங்களே...
யாரையெல்லாம் உறுப்பினர்களாக சேர்க்கலாம்? என நீங்கள் கேட்பது புரிகிறது. குடிகாரர்கள், கொள்ளைக்காரர்கள், மக்கள் விரோதிகள் ஆகியோரின் நிழலைக்கூட நாம் நெருங்கக்கூடாது. ஆம்! அவர்களெல்லாம் வேண்டாம். வேண்டவே வேண்டாம்.

பென்குவின் பறவைக்கு ஒரு சிறப்பம்சம் உண்டு. அன்னப்பறவை எப்படி பாலையும், தண்ணீரையும் பிரித்தெடுத்து பருகுமோ, அதுபோல நல்ல தண்ணீரையும், உப்பு தண்ணீரையும் தனித்தனியே பிரித்துக் குடிக்கும் ஆற்றல் பென்குவின் பறவைக்கு உண்டு. அந்த அழகான பறவையின் ஆற்றலைப் போன்றே, நாமும் உறுப்பினர்கள் தேர்வில் கவனம் செலுத்த வேண்டும்.

பொது ஒழுங்குகளுக்கு உரித்தான பொதுமக்கள் தான் நமது இலக்கு. அவர்கள் யாராகவும் இருக்கலாம். முஸ்லிம்கள், கிறித்தவர்கள், பிற்படுத்தப்பட்டவர்கள், தலித்துகள் என நமது கவனம் விரிய வேண்டும். நமது நீச்சல், குளத்தில் அல்ல... நீலக்கடலில் என்பதை மறந்துவிடக் கூடாது. யாரெல்லாம் நமது சேவை அரசியலை விரும்புகிறார்களோ அவர்கள் அனைவரையும் வென்றெடுக்கும் வகையில் நாம் செயல்பட வேண்டும்.

ஒரு வளரும் கட்சிக்கு அதன் ஊழியர்கள்தான் தூண்களாக இருக்க முடியும். அவர்களின் உற்சாகமான செயல்பாடுகள்தான் வளர்ச்சிக்கு வழிவகுக்கும். இளமையும், புதுமையும் கைகோர்க்கும் போது பயணமும், பணிகளும் சிறப்பாக இருக்கும். அவற்றோடு முதிர்ச்சியும் இணையும் போது இறையருளால் வெற்றி உறுதிப்படும்.

சொந்தங்களே...
வாருங்கள்! விரைந்து ஓடுங்கள்!
பாறைகளை உடைத்து பாதைகளை அமைப்போம்!
பார்வைகளை விரிவாக்கி பயணங்களை நடத்துவோம்!
மாபெரும் இலட்சியங்களின் புதல்வர்களாய், மக்களை சந்தித்து மாற்றங்களுக்கு விதை விதைப்போம். சிவந்த விழிகளில் கனவுகளை சுமந்து, தலைமுறைகள் வாழ களங்களை வெல்வோம்!

உங்களில் ஒருவன்
மு. தமிமுன் அன்சாரி