பாதுகாப்பானதா கூடங்குளம் உலை?

அணுஉலை விஷயத்தில் தமிழக அரசின் செயல்பாடு, தமிழக மக்களின் கண்களாக இருக்க வேண்டும்

இந்தியப் பிரதமர் நரேந்திர மோடி, ரஷ்ய அதிபர் விளாடிமிர் புதின், தமிழக முதல்வர் ஜெ.ஜெயலலிதா மூன்று தலைவர்களும், காணொளி மூலம் கூடங்குளம் அணுஉலையின் அடுத்தடுத்த அலகுகளை இந்திய நாட்டுக்கு அர்ப்பணித்திருக்கின்றனர். அணுசக்தி தேவையா, தேவையில்லையா எனும் விவாதத்தில் இருவேறு கருத்துகளுக்கு இடம் இருக்கலாம்; பாதுகாப்பு ஏற்பாடுகளில் அப்படி இருவேறு கருத்துகளுக்கு இடம் இருக்க முடியாது.

தமிழக முதல்வர் ஜெயலலிதா இந்நிகழ்ச்சியில் பேசுகையில், “கூடங்குளம் அணுஉலை குறித்து மக்களின் சந்தேகங்களைப் போக்க நிபுணர் குழு அமைக்கப்பட்டது. மக்களின் அச்சங்களைப் போக்க அரசு நடவடிக்கை எடுத்தது. கூடங்குளம் அணுஉலை உயர் பாதுகாப்பு அம்சங்கள் கொண்டது. கூடங்குளத்தைச் சுற்றியுள்ள பகுதி மக்களின் வளர்ச்சிக்கு தமிழக அரசு உறுதுணையாக உள்ளது” என்றெல்லாம் பேசியிருக்கிறார். இதே ஜெயலலிதா, கடந்த 2013 அக்டோபர் 13 அன்று, தூத்துக்குடியில் உள்ளாட்சித் தேர்தல் பிரச்சாரக் கூட்டத்தில் பேசும்போது “கூடங்குளம் அணுமின் நிலையத்தைப் பொறுத்தவரை, உள்ளூர் மக்களின் கருத்துகளுக்கு மதிப்பளிக்கும் வகையில் தமிழக அரசு நிச்சயம் செயல்படும். இந்தப் பிரச்சினையில் உங்களில் ஒருத்தியாக நான் இருப்பேன்” என்று குறிப்பிட்டது இங்கு நாம் நினைவில் கொள்ள வேண்டியது. இத்தகைய பின்னணியில் முதல்வர் ஜெயலலிதா தன்னுடைய சமீபத்திய உரையில் குறிப்பிட்டிருக்கும் ‘பாதுகாப்பு உறுதி’ எந்த அளவுக்கு உண்மையானது?

கள யதார்த்தம்

இந்திய அணுசக்தி ஒழுங்காற்று வாரியம் 1989-ம் ஆண்டிலேயே “கூடங்குளம் அணுஉலையிலிருந்து வரக்கூடிய அணுக் கழிவுகளை அணுஉலை பக்கத்திலேயே சேமிக்காமல், தொலைதூரத்தில் சேமிக்க வழி காண வேண்டும்” என்று கூறியுள்ளது. 2013-ல் உச்ச நீதிமன்றமும்கூட இதை நடைமுறைப்படுத்த வேண்டியதன் அவசியத்தை வலியுறுத்தி உத்தரவிட்டது. ஆனால், இன்றுவரை நடக்கவில்லை. ‘‘உச்ச நீதிமன்றத்தின் பரிந்துரைகளில் இரு பரிந்துரைகளை நிறைவேற்ற நீண்ட காலம் தேவைப்படும்’’ என்று அணுசக்தித் துறை உச்ச நீதிமன்றத்தில் தெரிவித்துள்ளது. நிறைவேற்றப்படாத இந்த இரண்டு பரிந்துரைகளும் அணுஉலையில் உள்ள ரியாக்டரின் பாதுகாப்பு அம்சங்கள் தொடர்பானவை. இத்தகைய பாதுகாப்பு அம்சங்களை நடைமுறைப்படுத்த உரிய நடவடிக்கைகள் இதுவரை எடுக்கப்படவில்லை.

நான் பல முறை சட்டமன்றத்தில் கோரிக்கை வைத்தேன், ‘‘தமிழக அரசு அமைத்ததாகக் கூறும் நிபுணர் குழுவின் அறிக்கையைச் சட்டமன்றத்தில் தாக்கல் செய்ய வேண்டும்’’ என்று. இதுநாள் வரை தாக்கல் செய்யப்படவில்லை. என்ன காரணம்? கூடங்குளம் அணுஉலையை எதிர்த்துப் போராடும் மக்களிடம் அந்தக் குழு எவ்விதக் கருத்துக்கேட்பு நிகழ்ச்சியையும் நடத்தவில்லை; மக்களின் அச்சங்களைப் போக்கும் எந்தவொரு நடவடிக்கைகளிலும் யாரும் ஈடுபடவில்லை. கூடங்குளம் மற்றும் அதைச் சுற்றி வாழும் மக்களுக்குப் பேரிடர் மேலாண்மைப் பயிற்சி எதுவும் இந்நாள் வரை அளிக்கப்படவில்லை. அணுஉலையில் விபத்து ஏற்பட்டால் பாதிக்கப்பட்ட மக்களுக்குச் சிகிச்சை அளிக்க அருகில் ஒரு பன்னோக்கு மருத்துவமனைகூட அமைக்கப்படவில்லை. இப்படிப்பட்ட நிலையில் முதல்வர் ஜெயலலிதாவின் பேச்சு எந்த அளவுக்கு உண்மைச் சூழலைப் பிரதிபலிக்கிறது?

பாதுகாப்பு ஓட்டைகள்

2014 அக்டோபரில் கூடங்குளம் அணுஉலையில் உள்ள முதல் அலகில் டர்பைன் என்று சொல்லக்கூடிய விசையாழியின் கத்திகள் உடைந்து, அவ்விசையாழிகள் கடுமையாகச் சேதமாகியுள்ளன என்று தகவல்கள் வெளியாயின. இதற்குச் சில மாதங்களுக்கு முன்பு அணுஉலையின் வால்வில் ஏற்பட்ட வெடிப்பின் காரணமாக ஆறு ஊழியர்கள் பலத்த காயத்துக்கு இலக்கானார்கள் என்ற தகவல் வெளியானது. ஜூலை 2013-ல் கூடங்குளம் அணுஉலையின் முதல் அலகு செயல்பாட்டுக்கு வந்ததாக அறிவிக்கப்பட்ட பிறகும்கூட, ஏறத்தாழ ஒன்றரை ஆண்டு காலம் அரைகுறையாகவே செயல்பட்டுவந்தது. இந்த இரண்டு வருடங்களில் கூடங்குளம் அணுஉலை பழுதடைந்து 32 முறை இயக்கம் நின்றிருக்கிறது என்கிறார்கள்.

இந்திய அணுசக்தி நிறுவனத்தின் முன்னாள் தலைவர் கோபாலகிருஷ்ணன், “கூடங்குளம் அணுஉலையில் நிறுவப்பட்டுள்ள இயந்திரங்கள் மற்றும் பாகங்கள் தரமற்றவை” என்று பகிரங்கமாக அறிவித்தார். “கூடங்குளம் அணுமின் நிலையம் பாதுகாப்பற்ற நிலையில் உள்ளது” என்றும் “அணுஉலை உபயோகத்துக்கு ஊழல்கள் நிறைந்த ரஷ்ய நிறுவனங்களிடமிருந்து வாங்கப்பட்ட அனைத்தும் தரமற்ற கருவிகள்” என்றும் “உடனே அலகு மூன்று மற்றும் நான்கைத் தொடங்குவதற்கான பணிகளை நிறுத்த வேண்டும்” என்றும் இந்திய கடற்படையின் முன்னாள் தளபதி அட்மிரல் ராம்தாஸ் தலைமையிலான குழு பிரதமர் நரேந்திர மோடிக்குக் கடிதம் அனுப்பியது.

விஸ்வநாதனின் சப்பைக்கட்டு

சட்டமன்ற உறுப்பினராக இருந்தபோது, கூடங்குளம் அணுஉலையின் செயல்பாடுகள் தொடர்பாக ஆகஸ்ட் 7, 2014 அன்று நான் சில முக்கியமான குறைகளைச் சுட்டிக்காட்டினேன். அதற்குப் பதிலளித்த அன்றைய எரிசக்தித் துறை அமைச்சர் நத்தம் விஸ்வநாதன், “சந்தேகப்படுவதற்கோ அல்லது ஐயமுறுவதற்கோ ஏதுமில்லை” என்று சப்பைக்கட்டு கட்டினார்.

அக்டோபர் 23, 2013 அன்று கூடங்குளம் அணுஉலை மின்இணைப்பில் சேர்க்கப்பட்டது முதல் 840 நாட்களில் 372 நாட்கள் மட்டுமே இயங்கியுள்ளது என்பது தமிழக முதல்வரின் கவனத்துக்கு வரவில்லையா அல்லது தெரிந்தும் மறைக்கிறாரா?

கூடங்குளம் அணுசக்தி நிலையத்தைச் சுற்றியுள்ள 30 கி.மீ. சுற்று எல்லையில் 10 லட்சம் மக்கள் வாழ்கிறார்கள். அணுஉலையில் விபத்து ஏற்பட்டால், இந்த மக்களை வெளியேற்றிக் காப்பாற்றுவதற்கு உருப்படியான திட்டம் ஏதும் அரசிடம் இருப்பதாகத் தெரியவில்லை. தமிழக மக்களின் பாதுகாப்பு மற்றும் வாழ்வுரிமை சம்பந்தப்பட்ட அளவில், இந்த அணுஉலையின் பாதுகாப்புத் தன்மை கேள்விக்குறியாகவே உள்ளது. உலகிலேயே மிக அதிக பாதகமான விளைவுகளை ஏற்படுத்தக் கூடியவை அணுஉலை விபத்துகள்தான். மேலை நாடுகளில் இவற்றைக் கண்காணிப்பதற்குச் சுயேச்சை அதிகாரமுள்ள அமைப்புகள் உள்ளன. இந்தியாவில் அப்படி எதுவும் இல்லை. எனவே, அணுஉலைகளின் பாதுகாப்பு என்பது மர்மமான இரும்புத் திரையாகவே உள்ளது.

மத்திய - மாநில அரசுகள் வளர்ச்சி என்ற மந்திரச் சொல்லால் எல்லோர் வாய்களையும் அடைத்துவிட முடியாது. கூடங்குளம் அணுஉலை இந்திய அணுசக்தித் துறையின் பெருமிதங்களில் ஒன்றாக இருக்கலாம். ஆனால், தமிழகத்தைப் பொறுத்த அளவில் அது பல்லாயிரக்கணக்கான தமிழர்களின் உயிராதாரப் பிரச்சினை. கூடங்குளம் அணுஉலையில் அடுத்தடுத்த அலகுகளை விரிவாக்கும் முன் உரிய முன்னெச்சரிக்கை நடவடிக்கைகளையும் முழுமையான பாதுகாப்பு நடவடிக்கைகளையும் எடுப்பது முக்கியம். இந்த விஷயத்தில் தமிழக அரசின் செயல்பாடு தமிழக மக்களின் கண்களாக இருக்க வேண்டுமே ஒழிய; மத்திய அரசின் வாயாக ஒலிக்கக் கூடாது!

கட்டுரையாளர் - மனிதநேய மக்கள் கட்சியின் தலைவர்,

தொடர்புக்கு: jawahirinfo@gmail.com

10 ஆண்டுகளுக்கு மேல் சிறையில் உள்ளவர்களை விடுவிக்க தமுமுக & மமக வலியுறுத்தல்

துக்ளக் வார இதழின் 45வது ஆண்டுவிழாவில் பேராசிரியர் ஜவாஹிருல்லா 

துக்ளக் வார இதழின் 45வது ஆண்டுவிழாவில் பங்குக் கொண்டு நான் ஆற்றிய உரையின் முழு வடிவத்தை இங்கே தருகிறேன். தலா 15 நிமிடங்கள் மட்டுமே மூன்று விருந்தாளிகளுக்கும் வழங்கப்பட்டது. நான் 19 நிமிடங்கள் பேசினேன். இன்னும் பல செய்திகளை சொல்வதற்கு நான் தயார் நிலையில் இருந்த போதினும் குறுகிய காலத்தில் எண்ணிய அனைத்தையும் பதிவுச் செய்ய இயலவில்லை என்ற வருத்தம் எனக்கு உண்டு. இருப்பினும் ஆர்எஸ்எஸ் மற்றும் பாஜகவினரும் அவர்களது அபிமானிகளும் நிறைந்திருந்த அந்த நிகழ்வில் மோடி ஆட்சியின் அவலத்தை அவர்கள் உணரும் வகையில் பேசும் வல்லமை தந்த ஏக இறைவனுக்கே எல்லா புகழும்
++++++++++++++++++++++++++++++++++++++++++++++++++++
தொடக்கமாக இந்த நிகழ்விலே பங்குக் கொண்டு உரையாற்ற வாய்ப்பு தந்தமைக்காக நன்றி தெரிவித்துக் கொள்கிறேன். 1983ல் நான் சார்ந்திருந்த மாணவர் இஸ்லாமிய இயக்கம் சார்பாக நடத்தப்பட்ட தீமை எதிர்ப்பு வாரத்தின் நிறைவாக நடத்தப்பட்ட கருத்தரங்கில் எங்கள் அழைப்பை ஏற்று வருகை புரிந்து மது ஆபாசம் வட்டி லாட்டரி முதலிய தீமைகளுக்கு எதிராக உரையாற்றினார். 30 ஆண்டுகளுக்கு பிறகு இன்று அவரது அழைப்பை ஏற்று நான் தங்கள் முன் உரையாற்ற நிற்கிறேன்.

மாணவப் பருவத்திலிருந்து துக்ளக் இதழை நான் வாசித்து வந்துள்ளேன். துக்ளக் வெளியிடும் கருத்துகளில் எனக்கு ஏராளமான மாற்றுக் கருத்து இருந்த போதினும் வெகுஜன தமிழ் அரசியல் வார இதழ்பத்திரிகை உலகில் துக்ளகின் வருகை ஒரு பெரும் திருப்பத்தை ஏற்படுத்தியது என்பது மறுக்க முடியாத உண்மை. நடிகர் நடிகைகளின் தனிப்பட்ட வாழ்வு குறித்து புலனாய்வு செய்துக் கொண்டிருந்த இதழ்களுக்கு இடையே துக்ளக் பிரசுரமாகி அரசியல் ரீதியான சிந்தனைகளை பரவச் செய்ய வழிவகுத்தது. 1992 டிசம்பர 6 அன்று உச்ச நீதிமன்றத்தின் உத்தரவை மீறி பாபரி மஸ்ஜித் இடிக்கப்பட்ட போது அந்த சட்டவிரோத செயல் நடைபெற்ற தினம் ஒரு கருப்பு தினம் என்பதை பிரதிபலிக்கும் வகையில் முழுமையாக கருப்பு வண்ணத்தில் துக்ளக் வெளிவந்ததையும் நான் இங்கு நினைவு கூற விரும்புகிறேன்.

இன்றைய அரசியல் என்ற தலைப்பில் உரையாற்றுமாறு நான் பணிக்கப்பட்டிருக்கிறேன்.
2014ம் ஆண்டு மத்தியில் ஒரு ஆட்சி மாற்றம் நிகழ்ந்த ஆண்டாக அமைந்தது. திரு. நரேந்திர மோடி அவர்கள் தலைமையில் மத்தியில் புதிய ஆட்சி பொறுப்பேற்றது. நாடாளுமன்றத் தேர்தலில் பாஜக 282 இடங்களிலும் அது தலைமை தாங்கிய தேசீய ஜனநாயக கூட்டணி 336 இடங்களிலும் வெற்றிப் பெற்றன. இருப்பினும் வாக்களித்த மக்களில் 69 விழுக்காட்டினர் மோடிக்கு எதிராக வாக்களித்தார்கள் என்பதை நாம் மறக்க முடியாது.

சேது சமுத்திரத் திட்டம்
========================

பல்வேறு கவர்ச்சிகரமான மனதை சுண்டியிழுக்கும் வாக்குறுதிகளை அளித்து திரு. நரேந்திர மோடி அரசு பதவிக்கு வந்தது. ஆனால் தேர்தலின் போது அளித்த வாக்குறுதிகளில் பல ஆட்சிக்கு வந்த பிறகு நிறைவேற்றப்படவில்லை. , முந்தைய காங்கிரஸ் தலைமையிலான அரசு நடைபெற்ற போது பாஜக எடுத்த நிலைப்பாட்டிற்கு நேர்மாற்றமாக மோடி அரசு செயல்பட்டு வருகின்றது. முந்தைய காங்கிரஸ் கட்சி போட்ட பாதையிலேயே இந்த அரசும் பயணிக்கின்றது. எடுத்துக் காட்டாக திரு. வாஜ்பாய் அவர்கள் பிரதமராக இருந்த போது தொடங்கப்பட்ட சேது சமுத்திரத் திட்டத்தை பின்னர் பாஜக கடுமையாக எதிர்த்தது. தற்போது ஆட்சிக்கு வந்த பிறகு மீண்டும் மாற்று வழியில் அதனை நடைமுறைப்படுத்த முயற்சிக்கின்றது.

100 நாள் வேலை வாய்ப்பு திட்டத்திற்கு வேட்டு தான் ஏழைகளின் அரசின் லட்சணமா?
=============================================================
திரு. நரேந்திர மோடி அவர்கள் பிரதமராக பதவியேற்ற பிறகு நாடாளுமன்றத்தில் உரையாற்றும் போது இந்த அரசு ஏழைகளுக்குச் சொந்தமான அரசு. ஏழைகளுக்கு வறுமையை ஒழிக்கும் வல்லமையை அளிப்போம். அதன் மூலம் அவர்கள் கண்ணியமாக வாழ்வதற்கு வழிவகுப்போம் என்றார். திரு.மோடி அவர்கள் இது போன்று கவர்ச்சிகரமாக பேசுவதில் தான் வல்லவராக இருக்கின்றார். ஆனால் அவரது செயல்பாடு இதற்கு நேர் மாற்றமாக இருக்கின்றது. எடுத்துக்காட்டாக சொல்ல வேண்டுமெனில் 100 நாள் வேலைத் திட்டத்தை முடக்குவதற்கு மோடி அரச எடுத்துள்ள நடவடிக்கையை குறிப்பிடலாம். மகாத்மா காந்தி தேசீய ஊரக வேலைவாய்ப்பு உத்தரவாத திட்டம் உலகம் கண்டிராத மிகப் பெரும் அரசு வேலை வாய்ப்பு திட்டமாக இருந்து வந்துள்ளது. இத்திட்டத்தின் கீழ் கடந்த நிதியாண்டில் 4.8 கோடி வீடுகளைச் சேர்ந்த 7.4 கோடி மக்கள் பயனடைந்தார்கள். இத்திட்டத்திற்கு கடந்த ஆண்டு அரசுக்கு ஏற்பட்ட செலவீனம் 39 ஆயிரம் கோடி ரூபாய். ஜிடிபி (ஒத்துமொத்த உள்நாட்டு உற்பத்தி) 0.5 விழுக்காடு மட்டுமே. பிரதமர் மோடி தனது உரையில் குறிப்பிட்டவாறு கிராம புற ஏழைகள் வறுமையை ஒழிக்க உதவிடும் இந்த திட்டத்தை மேலும் விரிவுப்படுத்தி இன்னும் அதிமான மக்களை அது சென்றடைய செய்திருக்க வேண்டும். ஆனால் மாநிலஅரசுகளுக்கு இந்த திட்டத்தின் கீழ் வழங்கப்படும் நிதியை பெரும் அளவில் குறைத்துள்ளதுடன் அதன் பயனை மட்டுப்படுத்தும் முடிவையும் எடுத்துள்ளது. இதன் விளைவாக தமிழ்நாட்டில் 385 ஊராட்சி ஒன்றியங்களில் செயல்பட்டு வந்த இந்த திட்டம் தற்போது 98 ஊராட்சிகள் என்ற அளவு குறைந்து கிராமபுற ஏழை மக்களை பெரிதும் பாதித்துள்ளது. மோடி ஆட்சிக்கு வந்த பிறகு ஊரக வேலைவாய்ப்பு திட்டத்தில் பயனடைந்த ஏழை மக்களிடமிருந்து நல்ல நாட்கள் விடைப் பெற்று சென்று விட்டன.

மகளிர் சுய உதவிக் குழுக்களுக்கும் வேட்டு
========================================

இதே போல் மகளிர் சுய உதவிக் குழுக்களும் இது வரை அனுபவித்து வந்த நல்ல நாட்களும் பறிபோய்விடும் போல் தெரிகின்றது. சுய உதவி குழுக்கள் கலைக்கப்படலாம் என்று மத்திய அமைச்சர் மேனகா காந்தி கருத்து வெளியிட்டுள்ளார். மகளிர் சுய உதவிக் குழுக்களால் தான், தமிழகத்தின் கிராமப்புற பொருளாதாரம் மேம்பட்டிருப்பதோடு, குடும்பத்தில் இருக்கும் பெண்கள், பிறரை சாராமல் தன்னிறைவு பெற்றுள்ளனர். . நாடு முழுவதும் பரவலான வளர்ச்சியை, பெண்கள் மத்தியில், சுய உதவிக்குழுக்கள் ஏற்படுத்தி உள்ள நிலையில் அவற்றை கலைப்பது தான் மோடி அரசுக்கு வளர்ச்சியாக தெரிகின்றதா?

மோடி அரசின் அச்சே தீன் பெரும் முதலாளிகளுக்கு மட்டுமே
திரு. நரேந்திர மோடிதேர்தலில் வெற்றிப் பெற்றவுடன் பாரதம் வெற்றிப் பெற்றுள்ளது. இனி அச்சே தீன் அதாவது நல்ல நாட்கள் வரப் போகின்றன என்றார். ஆனால் அவரது ஆட்சியில் பெரும் கார்ப்ரேட் முதலாளிகளும் மேல் தட்டு மக்களும் தான் நல்ல நாட்களை அனுபவித்து வருகின்றார்கள். எடுத்துக்காட்டாக கல்வி உதவி தொகை கடன் பெறுவதற்கு நாட்டுடமையாக்கப்பட்ட வங்கிகள் சாமனிய மாணவர்களை பெரிதும் அலைக்ககழிக்கின்றன. எங்களை போன்ற சட்டமன்ற உறுப்பினர்கள் பரிந்துரைத்தாலும் கல்வி உதவி தொகை அளிப்பதில்லை. ஆனால் பிரதமர் மோடி ஆஸ்திரேலியா சென்ற போது அவருடைய நண்பரும் பெரும் முதலாளியுமான அதானியையும் அழைத்துச் சென்றார். குவின்ஸ்லாந்து மாகாணத்தில் நிலக்கரி சுரங்க திட்டத்தை அதானி குழுமம் தொடங்குகின்றது. இத்திட்டத்திற்கு ஆஸ்திரேலியாவில் உள்ள ஐந்து முக்கிய வங்கிகள் அதானி குழுமத்திற்கு கடன் அளிக்க மறுத்து விட்டன. இச்சூழலில் இத்திட்டத்தை செயல்படுத்துவதற்காக பாரத ஸ்டேட் வங்கி 6200 கோடி ரூபாய் கடன் அளிப்பதற்கான புரிந்துணர்வு ஒப்பந்தம் பிரதமர் மோடி முன்னிலையிலேயே கையெழுத்தாகின்றது. எனவே தான் நாம் சொல்கிறோம் பிரதமர் மோடி சொன்ன நல்ல நாட்கள் பெரும் கார்ப்ரெட் முதலாளிகளுக்கு மட்டுமே வந்துள்ளன.

மோடி அரசின் விளம்பரப் பித்து
============================

வளர்ச்சிக்கான ஆக்கபூர்வமான பணிகள் நடக்கின்றதோ இல்லையோ மோடி ஆட்சியில் பகட்டான விளம்பரங்கள் மட்டும் தாராளமாக அரங்கேற்றப்படுகின்றன. இதற்கு ஒரு சிறந்த எடுத்துக் காட்டு சுவச் பாரத் தூய்மை இந்தியா திட்டம். திரு. சோ அவர்களே (22.10.2014) இந்த திட்டம் விளம்பரம் பெறுவதற்கான திட்டம்; தூய்மை இந்தியா பேனர்கள் போஸ்டர்கள் எல்லாம் குப்பையோடு குப்பையாக கலந்திருக்கும் என்று மிக சரியாக சொல்லியிருக்கிறார். தலைநகர் டெல்லியில் பாஜக தலைவர் சதீஸ் உபாத்யாயா குப்பைகளை கொட்டிவிட்டு பிறகு அதனை தூய்மைப்படுத்தியதை 26 10 இதழில் ஸ்டன்ட் என்று வர்ணிக்கிறார் சோ. எந்த அளவிற்கு இந்த விளம்பர மோகம் இந்த அரசை ஆட்டி படைக்கின்றது என்பதற்கு இது மட்டுமல்ல இன்னும் பல சான்றுகள் உள்ளன. சமீபத்தில் இலங்கையில் தூக்கு தண்டனை விதிக்கப்பட்ட தங்கச்சி மடத்தைச் சேர்ந்த ஐந்து மீனவர்கள் விடுதலைச் செய்யப்பட்டார்கள். இதில் மத்திய அரசிற்கு பெரும் பங்கு இருப்பது போல் தமிழக அரசுக்கும் பங்கு உண்டு. தூக்கு தண்டனை அளிக்கப்பட்டட செய்தி வந்தவுடன் பொங்கியெழுந்து போராட்டங்கள் நடத்திய ராமேஸ்வரம் மீனவர்களுக்கும் இது போல் இந்த 5 மீனவர்களும் விடுதலைச் செய்யப்பட வேண்டுமென்று ஒருமித்து குரல் எழுப்பிய தமிழகத்தின் அனைத்து அரசியல் கட்சிககள் மற்றும் பொது நல அமைப்புகளுக்கும் உண்டு. ஆனால் இந்த மீனவர்கள் விடுதலைச் செய்யப்பட்டவுடன் திருச்சி அழைத்து வராமல் டெல்லிக்கு அழைத்துச் சென்று அங்கு அவர்களை வரவேற்க காத்திருந்த தமிழக அரசின் பிரதிநிதிகளுக்கு கூட காட்டாமல் ஒரு ஹோட்டலுக்கு அழைத்துச் சென்று ராஜபக்சேவிற்கு நன்றி பிரதமர் மோடிக்க நன்றி என்று துர்தர்ஷன் மற்றும் எஎன்ஐ நிறுவனங்களுக்கு மட்டும் சொல்ல வைத்து மீண்டும் அவர்களை சென்னைக்கு திருப்பி அனுப்பியதின் மர்மம் என்ன? கொழும்புவிலிருந்த தங்கச்சி மடம் வர குறுக்கு வழி கொழும்பு டெல்லி சென்னை ராமநாதபுரம் தானா?
ராமநாதபுரத்தில் நடைபெற்ற தேர்தல் பரப்புரை கூட்டத்தில் திரு மோடி அவர்கள் தான் ஆட்சிக்கு வந்தால் தமிழக மீனவர்கள் பிரச்னை தீர்க்கப்படும் என்றும் மீனவர்களுக்கான தனி அமைச்சகம் அமைக்கப்படுமென்றும் வாக்குறுதி அளித்தார். தமிழக மீனவர்களுக்கும் நல்ல நாட்கள் வந்தபாடில்லை. அன்றாடம் உயிரை பணயம் வைத்து நமது மீனவர்கள் கடலுக்குச் செல்லும் நிலை உள்ளது. மோடி அவர்கள் ஆட்சிக்கு வந்த பிறகு இலங்கை கைப்பற்றியுள்ள தமிழக மீனவர்களின் படகுகளில் ஒன்றை கூட மீட்க முடியாத வலிமையான பிரதமராக அவர் உள்ளார். இது வரை 90 தமிழக மீனவர்களின் படகுகள் இலங்கை வசம் உள்ளன.

பாரம்பரிய மீனவர்களின் உரிமைகளுக்கு காத்திருக்கிறது ஆபத்து
=======================================================

பாரம்பரிய மீனவர்களின் மீன்பிடி உரிமையை பறிக்கும் திட்டமும் மோடி அரசிடம் உள்ளது. பசுமை புரட்சி வென்மை புரட்சியை தொடர்ந்து நீலப் புரட்சியை ஏற்படுத்துவோம் என்று பிரதமர் மோடி குறிப்பிட்டுள்ளளார். இந்த நீலப் புரட்சி என்பது நமது கடற்கரையோரம் கடலை நம்பி வாழும் மீனவர்களின் வாழ்வுரிமையை பறிப்பது தான். இதற்கு ஏதுவாக மத்திய வேளான்மைத் துறையில் உதவி தலைமை இயக்குனராக இருக்கும் மீனா குமாரி தலைமையிலான குழு மத்திய அரசிடம் கடந்த ஆகஸ்ட் 20 அன்று சமர்பித்துள்ள அறிக்கை அமைந்துள்ளது. வெளிநாட்டு மீன்பிடி படகுகளும் அதனை இயக்குவதற்கு வெளிநாட்டு படகோட்டிகளும் நமது கடல் பகுதியில் உருவாக்கப்பட போகும் exclusive economic zone பிரத்யோக பொருளாதார மண்டல்த்தில் ல் இயங்கப் போகின்றார்கள். இது ஐடிசி டன்லப் மற்றும் டாட்டா முதலிய பெருமுதலாளிகள் மீன்பிடித் தொழிலில் ஈடுபடும் திட்டத்திற்கு வழிவகுத்து அவர்களுக்கு அச்சே தீனை மோடி அரசு வழங்கிட பெரிதும் உதவிடும்.

தமிழகத்தில் அணு உலைகளும் மீத்தேனும்
======================================

. சமீபத்தில் ரஷ்யா அதிபர் புதின் இந்திய வருகை தந்த போது 12 அணுஉலைகளுக்கான புரிந்துணர்வு ஒப்பந்தம் கையொப்பமாகியுள்ளது. இவற்றில் பெரும்பாலனவை தமிழகத்தில் கூடங்குளத்தில் தான் அமைக்கப்படும். தமிழகத்தில் மட்டும் தான் இரண்டு ஊர்களில் கூடங்குளம் மற்றும் கல்பாக்கத்தில் அணுஉலைகள் உள்ளன. ஏனைய மாநிலங்களில் ஒரே இடத்தில் மட்டுமே உள்ளது. மராட்டியத்தில் ஜைத்தாபூரில் அணுஉலை அமைக்க அனுமதிக்க மாட்டோம் என்று பிஜேபியை சேர்ந்த அம்மாநீலத்தின் சுற்றுச் சூழல் அமைச்சர் கதம் தெளிவாகவே குறிப்பிட்டுள்ளளார்.. தமிழக அரசு மட்டும் தமிழ்நாட்டை அணுஉலைகளின் குப்பைத் தொட்டியாக மாற்றுவதற்கு அனுமதிப்பது நியாயமா?
இதே போல் தமிழகத்தின் நெல் களஞ்சியமான காவிரி படுக்கை பகுதியான பழைய தஞ்சை பகுதியீல் மீதேன் எரிவாயு எடுக்கும் திட்டத்திற்கு பொது மக்கள் கடும் எதிர்ப்பு தெரிவித்து வருகின்றார்கள். இது காவிரி படுக்கை பகுதியில் 50 லட்சம் உழவர்களை விரட்டியடிக்கும் திட்டம். முதலில் மீத்தேன் எரிவாயு பிறகு நிலக்கரி எடுக்கும் திட்டம் உடனடியாக தடுத்து நிறுத்தப்பட்டு காவிரி படுக்கை பகுதி விவசாய பாதுகாப்பு மண்டலமாக அறிவிக்கப்பட வேண்டும் என்பது தான் அப்பகுதி மக்களின் விருப்பம். இது குறித்து மத்திய மாநில அரசுகள் தங்கள் நிலைப்பாட்டை மக்களுக்கு அறிவிக்க வேண்டும். அப்போது தான் டெல்டா பகுதி மக்களுக்கு மட்டும் அல்ல தமிழக மக்களுக்கே நல்ல நாள் பிறக்கும்.

சங்கபரிவாரின் வரம்புமீறிய பேச்சுகள்
==================================

'ஆட்டைக் கடித்து மாட்டை கடித்து மனுஷனைக் கடித்த கதையாக பாபர் மசூதியை இடித்த ஹிந்து பரிவாரம், ராமருக்குக் கோவில் எழுப்புவதில் ஆரம்பித்து இப்போது கோட்ஸேவுக்குக் கோவில் கட்டுவது வரை வந்து விட்டது. இவர்களைப் பிடித்தாட்டுகிற ஹிந்துத்துவ வெறியில் இன்னும் யார் யாருக்கெல்லாம் கோவில் கட்டப் போகிறார்களோ, யார் யாருக்கெல்லாம் சிலை வைக்க வேண்டுமென்னு சொல்வார்களோ தெரியவில்லை. ஹிந்துத்துவ வெறி இவர்களைப் படாதபாடு படுத்துகிறது ' என்று நான் சொல்ல வில்லை துர்வாசர் துக்ளக் ஜனவரி 14 இதழில் ஆணித்தரமாக பதிவுச் செய்துள்ளார். இது அவரது எண்ணோட்டம் மட்டுமல்ல நமது நாடு மதசார்பற்ற நாடாக நீடித்து நிலைக்க வேண்டும் என்று விரும்பும் அனைவரது கவலையும் இது தான்.

'பாஜகவில் உள்ள சிலர் எம்.பி.க்கள் முக்கியஸ்தர்கள் மனம் போன போக்கில் பேசி வருகின்றார்கள். 'மோடியை ஏற்காதவர்கள் பாகிஸ்தானுக்கு போகலாம்.. ராமரைத் தந்தையாக ஏற்காதவர்கள் முறைகேடாக பிறந்தவர்கள் என்பது போல் துவேஷத்தைத் தூண்டுகிற பல பேச்சுக்கள் ஹிந்துத்துவ அமைப்புகளால் அரங்கேற்றப்பட்டு வருகின்றன' என்று மீண்டும் நான் சொல்லவில்லை துக்ளக் டிசம்பர் 24 தலையங்கம் குறிப்பிடுகின்றது.

இந்த நிகழ்ச்சியின் தொடக்கத்தில் கண்டவர்கள் பேசுவதற்கெல்லாம் மோடி பதில் சொல்ல வேண்டும் என்று எதிர்பார்க்க கூடாது என்றார் திரு சோ. ஆனால் அவரே துக்ளக் செப்டம்பர் 10, 2014 இதழின் தலையங்கத்தில் குறிப்பிட்டுள்ளதை இங்கே நினைவுப்படுத்த விரும்புகிறேன்.

' பாஜக தனிப் பெரும்பான்மையுடன் ஆட்சிக்கு வந்து விட்டதால் இந்த மாதிரிப் பிரசாரங்கள் நடக்கின்றன. இதற்கு அரசு கடுமையான எதிர்ப்பு தெரிவிக்க வேண்டும். மோடியோ அமித் ஷாவோ இது பற்றிப் பேசாமல் இருப்பது இதற்கு அவர்களுடைய அங்கீகாரம் உண்டு என்று கூறுவது போல் இருக்கின்றது' என்ற விமர்சனம் மற்ற மதத்தினரிடையே மாத்திரமல்ல, ஹிந்துக்களிடையே கூடத் தோன்றும்' என்று அந்த தலையங்கம் கூறியுள்ளது.

அரசியலமைப்புச் சட்டமே இணைப்பு பாலம்
=======================================

நமது நாடு பல பூக்கள் பூக்கும் ஒரு கதம்ப மலர் தோட்டம். இந்த பூக்களின் வண்ணங்களும் வாசங்களும் வேறுபட்டதாக இருக்கலாம். ஆனால் அத்தனை பூக்களும் அந்த தோட்டத்தின் மலர்கள் என்று பெருமைக் கொள்ளும் வகையில் அனைத்து இந்தியர்களையும் இணைக்கும் ஒரே புள்ளி இந்தியாவின் மதசார்பின்மையை உறுதிச் செய்யும் நமது அரசியலமைப்புச் சட்டம் தான். அந்த இணைப்பு பாலத்திற்கு பங்கம் வரும் வகையில் யார் பேசினாலும் செயல்பட்டாலும் அவர்கள் கண்டிக்கப்பட வேண்டியவர்கள் மட்டும் அல்ல சட்டப்படி தண்டிக்கப்பட வேண்டியவர்கள். ஆனால் மோடி அரசு அப்படி நடவடிக்கை எடுக்கும் என்ற நம்பிக்கை எங்களைப்போன்றோருக்கு இல்லை.

பாரிஸ் பெஷாவர் தாக்குதல்
=============================

இறுதியாக பிரான்ஸ் நாட்டில் சார்லி பெப்டே என்று நையாண்டி பத்திரிகையை தாக்கி அதன் ஆசிரியர் உட்பட 12 பேர் கொல்லப்பட்டதை வன்மையாக கண்டிக்கிறேன். இது ஒரு காட்டுமிராண்டித்தனமான செயல். இதனை யார் செய்தார்கள் என்பது உறுதியாக இது வரை தெரியாவிட்டாலும் தாக்குதல் நடத்தியவர்கள் இறைதூதர் நபிகள் நாயகம் குறித்து கேலி சித்திரம் வரைந்ததற்காக பலி வாங்கினோம் என்று சொன்னதாக ஊடகங்கள் தெரிவிக்கின்றன. இந்த பயங்கரவாத நடவடிக்கையில் ஈடுபட்டவர்கள் முஸ்லிம்களுக்கு குறிப்பாக ஐரோப்பாவில் வாழும் முஸ்லிம்களுக்கு பெரும் துரோகம் இழைத்துவிட்டார்கள் என்பதே உண்மை. பெஷாவரில் பள்ளிக்கூடம் மீது நடைபெற்ற தாக்குதல்கள் எவ்வகையிலும் நியாயப்படுத்த இயலாது. இதே போல் ஐஎஸ் அமைப்பும் போகோ ஹராம் அமைப்பும் செய்வதாக ஊடகங்கள் தெரிவிக்கும் நடவடிக்கைகளும் காட்டுமிராண்டித்தனமானவை. இந்த பயங்கரவாதிகளுக்கும் இஸ்லாத்திற்கு எவ்வித தொடர்பும் இல்லை. ஏனெனில் இந்த அமைப்புகள் செய்து வருவது போன்ற பயங்கரவாதத்தை ஒரு போதும் இஸ்லாம் ஊக்குவிக்கவில்லை.

பயங்கரவாதத்திற்கு மதம் இல்லை. ஆனால் முஸ்லிம் பெயர் தாங்கிகள் செய்யும் பயங்கரவாதம் மட்டும் ஒரு சாரார் இஸ்லாத்துடன் இணைத்து பார்க்கப்படுகின்றது.

திருக்குர்ஆனில் வெறுப்பை போதிக்கும் வசனம் எதுவும் இல்லை -சுஜாதா
===============================================================

இந்த போக்கு குறித்து நமது சமகாலத்தில் வாழ்ந்து மறைந்து தமிழ் கூறும் நல்லுலகிற்கு தரமான பல இலக்கியங்களை வழங்கிய சுஜாதா அவர்களின் பதிலுடன் என் உரைக்கு முற்றுப்புள்ளி வைக்கிறேன். சுமார் பத்தாண்டுகளுக்கு முன்பு திரு. இராம சம்பந்தன் ஆசிரியராக இருந்த போது தினமணி வெளியிட்ட ரமலான் பெருநாள் மலரில் திருக்குர்ஆன் குறித்து ஒரு கட்டுரையை எழுதினார் சுஜாதா. அதன் இறுதி வரிகளில் 'திருக்குர்ஆனை முதலிலிருந்து கடைசி வரை தேடிப் பார்த்தாலும் மற்றவர் பேரில் வெறுப்பை வளர்க்கும் வாசகங்கள் எதுவும் இல்லை. பிரச்னை குர்ஆனில் இல்லை. நம்மிடம் தான். திறந்த மனதுடன் அதைப் படித்துப் பார்க்க விரும்பிய என் கண்களை திறந்த என் தந்தையார் தீவிர வைணவர்'

(நிகழ்வு குறித்து தினமணியில் இன்று வெளியான செய்தி)

‪ஐப்பசி_மழையும்_தை_மாத_குளிரும்‬!

                                                                                                           - எம். தமிமுன் அன்சாரி

ஒவ்வொரு வருடமும் அக்டோபர் மாதம் வந்துவிட்டாலே மனசெல்லாம் மழைத் தூறல்களில் நனையும்! கார்த்திகை மாதம் கடும் மழை; ஐப்பசி மாதம் அடைமழை என்பார்கள்.

இம்மாதங்களில் மழையோ மழைதான்! கோடை கால கொடுமைகள் விடுபெற்று; குளிர்காற்றும்; தொடர் மழையும்; இடிமுழக்கமும்; மின்னல் வெட்டுகளும் மழைக்கால பொழுதுகளை இன்பமாக்கும். மேகங்கள் ஊர்வலம் போகும் அழகே அழகுதான்.

விடிகாலை இருளில் நடை பயில்வதே தனி சுகமாக இருக்கும். ஆறு, ஏரி, கிணறு குளங்களில் தண்ணீர் குளிப்பதற்கு இதமாக, சூட்டோடு வரவேற்கும். அப்போது உடம்பு ஒருவகை சுகத்தை உணரும். தாமதமாய் விடியும் காலையும், முன்கூட்டியே இருள் கவ்வும் மாலையும் மயக்கத்தைத் தரும்.

இக்காலக்கட்டங்களில் தஞ்சை, நாகை, திருவாரூர், கடலூர் மாவட்டங்களில் நெல் விவசாயம் செழித்தோங்கி நிற்கும். எங்கும் தண்ணீர் தேசமாய் காட்சியளிக்கும். வாய்க்கால்களில் குரவை, விறால், கெண்டை, ஜிலேபி ரக மீன்கள் துள்ளியோடும். தூண்டில்களோடு சிறுவர்கள் மீன் பிடிப்பார்கள். அதை கொத்திச் செல்வதற்கு மீன்கொத்தி பறவைகளுக்குப் போட்டியாக கொக்குகளும், மடையான்களும் அலை, அலையாய் பறக்கும். சிரவிகளும், நீர்க்கோழிகளும் ஆறு, ஏரிகளில் உலாவரும். அதைப் பிடிக்க வேட்டையாடிகள் சுற்றுவார்கள்.

கரையோடு கதை பேசிக் கொண்டு நகரும் நதியில் முதுகில் காட்டுச் செடிகளும், பூக்களும் ஊர்வலம் போகும்.

பசுமைப் போர்வை போர்த்திய பெருமையில் வயல்கள் காற்றாடி சிரித்துக் கொண்டிருக்கும். அப்போது சாலைப் பயணங்களில் விழிகள் ரசிக்க நகர்வதே ஒரு பொழுதுபோக்காக இருக்கும்.

உழவர்கள் நாற்று நடுவதும், களையெடுப்பதுமாக தங்கள் பொருளாதாரத்தை நிமிர்த்துவதற்கு குனிந்தபடியே இயங்கிக் கொண்டிருப்பார்கள்.

மழைத்தூறல்கள் வலுக்கும்போது கிராமங்களில் கிலுவைப் போன்ற மரங்களை வெட்டி வீடுகளுக்கு வேலி வைப்பார்கள்.

ஆடு, மாடுகளைப் பராமரிப்பதில் மிகுந்த கவனம் செலுத்துவார்கள். மேய்ச்சல் நிலங்கள் பசுமையாக இருக்கும்.

பனங்கிழங்குகளும், மரவெள்ளிக்கிழங்குகளும், சர்க்கரைவள்ளிக் கிழங்குகளும் வீதி, வீதியாக விற்பனைக்கு வரும். மழைக்கால மாலைப் பொழுதுகளில் சூடாக சாப்பிடுவது ஒருவகை மகிழ்ச்சியாக இருக்கும்.

வீட்டுத் தோட்டங்களில் பீர்க்கைச் செடிகள் பூப்பூத்து காய் காய்க்கும். செடிகளுக்குள் பச்சை நிறத்திற்குள் பச்சையாக ஒளிந்திருக்கும் பீர்க்கையைத் தேடி, தேடி பறிப்பது ஒரு காலை நேர கடமையாகவே இருக்கும்.

கரும்பு, நிலக்கடலை என சாகுபடிகள் பலவேறாக இருக்கும். கதிர் அரிவாளோடு அலையும் விவசாயத் தொழிலாளர்கள், இவ்வருடம் பொங்கல் எப்படி இருக்குமோ? என பொருளாதார நிலைக் குறித்த கவலையோடு ஒருவருக்கொருவர் பேசிக்கொள்வார்கள். ஒருவழியாக மழைக்காலம் விடைபெறும்.

மார்கழியில் பனிக்கொட்டும். வாடைக்காற்று வீசும். ஒரு போர்வைக்குள் ஒளிந்துகொள்ள உடம்பு துடிக்கும்.

மழைக் காலத்திலிருந்து மாறிடும் பனிக்காலம், அறுவடையின் பொற்காலமாகும். பச்சை வயல்கள் கதிர் முற்றி; தலைசாய்ந்து; வயலுக்கு வந்த பெண்ணின் வெட்கத்தோடு; தலைகவிழ்ந்து பொன்னிறமாக காட்சியளிக்கும்.

இளங்காலையில் ஈர புற்களில் பனித்துளிகள் மகுடம் சூட்டியிருக்கும். ஆங்காங்கே தண்ணீர் பரப்புகளிலிருந்து பனிப்புகை எழும் காலைப் பொழுதுகள் ரம்மியமானவையாக காட்சி தரும். பெரும்பாலோர் கதகதப்பை தரும் போர்வைகளோடு வெளியே வருவார்கள். ஒரு சூடான தேனீர் அவர்களை உசுப்பேற்றும்.

மார்கழி இறுதியிலிருந்தே அறுவடை தொடங்கி நடைபெற்று, களத்தில் கட்டுக்கட்டாக கதிர்கள் அடுக்கப்பட்டு வைக்கோலும், நெல்மணிகளும் பிரிக்கப்படும். தார்ச் சாலைகளில் வைக்கோல் பரத்தப்பட்டு கட்டுகளாக மாற்றப்படும். இவையனைத்தையும் இயந்திரங்கள் இப்போது செய்கின்றன. சிறு விவசாயிகள் பழைய முறைகளைப் பின்பற்றுகிறார்கள்.

இரட்டை மாட்டு வண்டிகள், டிராக்டர்கள், மினி லாரிகளில் மூட்டை, மூட்டையாய் நெல் பயணப்படும். வீடுகளுக்கு நெல் வருவதே கொண்டாட்டாக இருக்கும். உறவுகள் கூடி ‘புதிய அரிசி சோறு’ என குடும்ப விருந்துகள் நடக்கும். காய்கறி ஆணம் மணக்கும். கரும்புகளும், வாழைப் பழங்களும் விருந்துக்கு வலு சேர்க்கும்.

சேற்றில் உழைத்த விவசாயிகள் கூலிகளைப் பெற்றுக் கொண்டு பொங்கலுக்கு புதுத்துணிகளை எடுக்க குடும்பத்தோடு நகர்ப்புறங்களுக்கு வருவார்கள். கிராமச் சந்தைகள் களை கட்டும்.

விவசாயத் தொழிலாளர்களுக்கு புயல், வெள்ளம் வந்தால் அவர்களுக்குப் பொங்கல் இல்லை. அது கறுப்பு பொங்கலாக கணக்கும். இவ்வருடம் போல் பருவகாலம் அமைந்திருந்தால் அவர்கள் மகிழ்ச்சியோடு கொண்டாடுவார்கள். சர்க்கரைப் பொங்கல் அந்த மகிழ்ச்சியை வெளிப்படுத்தும்.

இன்று காலம் மாறிவிட்டது. இயற்கை விவசாயம் அழிந்து, சுற்றுச்சூழல் சீர்கெட்ட இக்காலங்களில் சர்க்கரைப் பொங்கலை விட ‘பீட்ஸா’ சாப்பிடும் நாகரீகத்திற்கு தமிழர்கள் முன்னேறி விட்டார்கள்.

பொங்கல் போன்ற அறுவடைக் கொண்டாட்ட தினங்களுக்கு கிராமங்களுக்குச் சென்று மகிழ்வதில் யாருக்கும் ஆர்வமில்லை. நகர்ப்புற நெருக்கடிகளுக்கு வாழ்க்கையைப் பறிகொடுத்தவர்களுக்கு பொங்கலின் நோக்கம் புரிவதில்லை.

பொங்கலை 10 நாள் போனஸோடும், 5 நாள் அரசு விடுமுறைகளோடும் கொண்டாடும் யாரும், விவசாயத்தின் வளர்ச்சி குறித்தோ கவலைப்படுவதில்லை. அவர்கள் விவசாயிகளின் துயரங்கள் குறித்தோ கவலைப்படாமல் விடுமுறை தின மகிழ்ச்சியாக ‘பொங்கலை’ அனுபவிக்கிறார்கள். வழக்கமான வாழ்த்துச் செய்திகளில் உயிர் இல்லை; போலித்தனங்கள் மிகைக்கின்றன. அறுவடைத் திருநாள் ‘ஹேப்பி’ பொங்கலாகி விட்டது.

தாய்லாந்து, மெக்சிகோ, பிலிப்பைன்ஸ், ஸ்பெயின் என பல நாடுகளில் பொங்கல் அறுவடைத் திருநாளாக; வழிபாடுகளற்ற பொருளாதார ஏற்றத்தைப் பகிர்ந்து கொள்ளும் மகிழ்ச்சி நாளாக கொண்டாடப்படுகிறது.

மாட்டுப் பொங்கல் விளையாட்டு நிகழ்வாகவும், தைப்பொங்கல் பொருளாதார சுழற்சியை முன்னிறுத்திய அறுவடைத் திருநாளாகவும் கொண்டாட வேண்டியவை. அதை ஒருசார்பு நிகழ்வாகவும், வழிபாட்டு முறையாகவும் மாற்றியது யார்?

ஜனவரி 11 அன்று ‘தி ஹிந்து’ தமிழ் நாளிதழில், ‘வெட்டிவேரு வாசம்’ பகுதியில் இதே கேள்வியை இயக்குநர் தங்கர்பச்சான் எழுப்பியிருந்தார். அதை நானும் வழிமொழிகிறேன்.

பொங்கல் பருவக் காலங்களையொட்டி உழவர்கள் கொண்டாடும் மகிழ்ச்சிக்குரிய ஒரு நிகழ்வாகும். அதை சடங்குகளுடனும், வழிபாடுகளுடனும் ஆதிக்க சக்திகள் திசைமாற்றி விட்டார்கள்.

இனிவரும் காலங்களில் பொங்கல் என்பது இயற்கை விவசாயத்தையும், சுற்றுச்சூழலையும் முன்னிறுத்தி விவசாயத்தை வளர்த்தெடுக்கும் நிகழ்வாகவும், தமிழக மக்கள் எல்லோரும் பங்கேற்கும் ஒற்றுமை தினமாகவும் மாற்றப்பட வேண்டும்.

வாழ்க்கையை இயற்கையாகவும், இயற்கையை வாழ்க்கையாகவும் வாழ கற்றுக்கொள்வோம். வாழ்த்துக்கள்.

மக்கள் கடலில் மக்கள் வாழ்வுரிமை மாநாடு

மனிதநேய மக்கள் கட்சியின் 5 ஆம் ஆண்டு தொடக்க விழா கோவை மாவட்டத்தின் சார்பாக வாழ்வுரிமை மாநாடாக கடந்த 03/02/2013 ஞாயிற்றுக்கிழமை அன்று நடைபெற்றது.கோவை மாநகரின் நுழைவாயிலிருந்து கருப்பு வெள்ளை கருப்பு கழக கொடிகளில் பட்டொலி வீசிபறந்தது.

கோவை வ.உ.சி மைதானம் என்பது தமிழகத்தின்,இந்தியாவின் மிகப்பெரும் கட்சிகளான திமுக,அதிமுக,காங்கிரஸ் கட்சிகள் மட்டுமே இங்கு மாநாடுகளை நடத்தியுள்ளது.இதற்கெல்லாம் அடுத்தபடியாக மனிதநேய மக்கள் கட்சி தனது மாவட்ட மாநாட்டினை நடத்தி முடித்துள்ளது.

முன்னதாக வழக்கப்போல காவல்துறையின் பூச்சாண்டி வேலைகளுடன் (மாநாட்டிற்க்கு மூன்று நாள்கள் முன்னர் கோவையில் பெட்ரோல் குண்டு கண்டெடுப்பு என மாநாட்டினை சீர்குலைக்க சதி செய்தார்கள்)சதிக்காரர்களுக்கெல்லாம் சதி செய்வபன் ஒருவன் இருக்கின்றான் என கா(வி)வல் துறையினருக்கு தெரியாது.

 

காலையில் மருத்துவ முகாம்,புகைப்பட கண்காட்சி என தொடங்கியது மாநாடு.மாலை 3 மணிக்கு நடைபெறுவதாக இருந்த இளைஞர் படை,மகளிர் அணி அணிவகுப்புக்கு காவல்துறை தடை செய்தது.காவல் தடைகளை தகர்க்கும் தாய்கழகம் தமுமுக வில் பயின்ற மனிதநேய மக்கள் கட்சியின் இராணுவ அணிவகுப்பு டெல்லி பேரணியினை நினைவுகூர்ந்தது.சமையலறையை மட்டும் அலங்கரித்த தாய்மார்கள் தமுமுக வின் உதயத்திற்க்கு பின் சமுதாய போராட்டங்களையும் அலங்கரித்த வரலாற்றை கோவை மாவட்ட நிர்வாகிகளின் கூட்டு முயற்சியால் இது மக்கள் வாழ்வுரிமை மாநாடா ? மகளிர் வாழ்வுரிமை மாநாடா ? என சிந்திக்கவைக்கும் வண்ணம் மாலை 4 மணிக்கெல்லாம் மகளிர் பகுதியில் கூட்டம் அலைமோதியது என்றால் அது மிகையல்ல.

மாலை 5:00 மணிக்கு மாநாட்டு நுழைவு வாயிலில் மனிதநேய மக்கள் கட்சியின் கொடியினை ஏற்றிவைத்து இளைஞர் படையின் அணிவகுப்பினை ஏற்று கொண்டார் மாநில தலைவர் மெளலவி ரிபாய் அவர்கள்.தொடர்ந்து மாநாடு இறைவசனத்துடன் இனிதே தொடங்கியது.தலைமைக்கழக பேச்சாளர்கள் சகோதரர்கள் கோவை ஜாகீர்,ஜெய்னுலாபுதீன் ஆகியோர் உரை நிகழ்த்தினார்கள்.அமைப்பு செயலாளர் மன்னை செல்லச்சாமி சிறப்பான உரையுடனும் மாநில அமைப்புச்செயலாளர் மதுக்கூர் ராவுத்தர்ஷா அவர்களின் மனிதநேய மக்கள் கட்சியின் கொள்கை பாடலுடனும் மாநாடு சூடுபிடித்தது.மாநில நிர்வாகிகள் ஒருவர் பின் ஒருவராக தொடர்ந்து எழச்சி உரைகள் நிறைவேற்றினார்கள்.

மாநாட்டில் கலந்து கொண்ட ஆயிரகணக்கான கோவைவாசிகள் எங்களின் 20 ஆண்டு கால கனவு அல்லாஹ்வின் கிருபையால் மனிதநேய மக்கள் கட்சியின் சார்பாக நிறைவேறி உள்ளது எல்லா புகழும் இறைவனுக்கே என இறைவனை புகழ்ந்தவர்களாக கலைந்து சென்றனர்.

உள்ளாட்சி மன்ற உறுப்பினர்களுக்கான பயிற்சி முகாம் - திருச்சியில் நடைபெற்றது

திருச்சியில் நடைபெற்ற மனிதநேய மக்கள் கட்சியின் உள்ளாட்சி மன்ற உறுப்பினர்களுக்கான பயிற்சி முகாமில் சட்டமன்ற உறுப்பினர்கள், உள்ளாட்சி பிரதிநிதிகள் ஏராளமானோர் கலந்து கொண்டனர். மமக தலைவர் ஜே.எஸ். ரிபாயி தலைமையில் நடைபெற்ற இந்த பயிற்சி முகாமில் மமக மூத்த தலைவர் பேரா. எம்.ஹெச். ஜவாஹிருல்லாஹ், மமக பொதுச்செயலாளர் எம். தமிமுன் அன்சாரி, தமுமுக பொதுச்செயலாளர் ப. அப்துல் சமது, மாநில செயலாளர்கள் கோவை செய்யது,ஆம்பூர்சட்டமன்ற உறுப்பினர் அஸ்லம் பாஷா சம்சுதீன் நாசர் உமரி, தருமபுரி சாதிக், மைதீன் உலவி, ராவுத்தர்ஷா உள்ளிட்ட மாநில நிர்வாகிகள் கலந்து கொண்டனர்.

தமிழக உள்ளாட்சித் துறையில் பல்வேறு நிர்வாகப் பொறுப்புகளை ஏற்று திறம்படப் பணியாற்றிய வழக்கறிஞர் மஹபூப் அலி அவர்கள் மிகச்சிறப்பாக வகுப்பெடுத்தார். வாணியம்பாடி இஸ்லாமியா கல்லூரி பேராசிரியர் அபுல்பைசல் அவர்கள் உள்ளாட்சி சீர்திருத்தம் குறித்த கருத்துக்களை விளக்கினார்.

பேராசிரியர் எம்.ஹெச். ஜவாஹிருல்லாஹ் அவர்கள் மமகவினர் தூய்மையோடு ஆற்றிவரும் அரசியல் பணிகளை சிலாகித்து, மக்கள் விரும்பும் நேர்மையான அரசியலை மமக முன்னெடுக்கும் என்று அனைவரையும் உற்சாகப்படுத்தினார்.

நிகழ்ச்சிக்கான ஏற்பாடுகளை திருச்சி மாவட்ட நிர்வாகிகள் ஹக்கிம், இப்ராஹிம் ஷா, பைஜிஸ் அஹமது உள்ளிட்ட மாவட்ட நிர்வாகிகள் சிறப்பாக செய்திருந்தனர். இந்த ஒருநாள் பயிற்சி முகாமில் புத்துணர்வு பெற்றவர்களாக தங்கள் பணியை இன்னும் சிறப்பாக செய்ய வேண்டுமென்ற நோக்குடன் புறப்பட்டு சென்றனர்.

வெற்றிபெற்ற மமக உள்ளாட்சிப் பிரதிநிதிகளுக்காக சென்னையைத் தொடர்ந்து இரண்டாம் கட்டமாக திருச்சியில் இரண்டாவது பயிற்சி முகாமை நடத்தி தமிழகத்தில் வேறு எந்த அரசியல் கட்சியும் செய்யாத முயற்சியை முன்னெடுத்துள்ளது குறிப்பிடத்தக்கது.

 

இளையான்குடியில் பாஜகவின் ரவுடித்தனத்திற்கு பாடம் புகட்டியது தமுமுக - பத்திரிக்கை செய்திகள்

பொதுக்கூட்டத்தில் மனம்போனபடி கீழ்த்தரமாகப் பேசுவதும், தட்டிக்கேட்க ஆளில்லாததால் தறுதலைப் பேச்சுகளை மென்மேலும் வளர்ப்பதும்தான் சங்பரிவாரக் கும்பலின் கடந்தகால வரலாறு.

> காமத்தில் விஞ்சியது கன்னிமேரியா? கதீஜாவா? மணியம்மையா? என்றெல்லாம் அருவறுப்புத் தலைப்புகளில் பட்டிமன்றம் நடத்தி, தமிழகத்தில் மதவெறி நெருப்பை இந்து முன்னணி பற்றவைத்தது.

> 1995க்குப் பிறகு தமுமுக இந்தக் கயமைத்தனங்களுக்கு சட்டப்பூர்வ நடவடிக்கைகள் மூலம் முற்றுப்புள்ளி வைத்தது.

> அண்மையில் சென்னை புளியந்தோப்பு பகுதியில் நபிகள் நாயகத்தைப் பற்றி அவதூறாகப் பேசிய சங்பரிவார பேச்சு பயங்கரவாதி மீது தமுமுக வழக்குப் பதியச் செய்தது.

> வேலூரில் பாஜக பிரமுகர் டாக்டர் அரவிந்த ரெட்டியின் படுகொலையைக் கண்டித்து 26.10.2012 அன்று மாவட்டத் தலைநகரங்களில் பாஜக சார்பில் ஆர்ப்பாட்டம் நடத்தப்பட்டது.

> இதன் ஒரு கட்டமாக (மாவட்டத் தலைநகரமல்லாத) இளையான்குடியில் நடந்த ஆர்ப்பாட்டத்தில் பாஜக தலைவர்களில் ஒருவரான எச்.ராஜா கலந்துகொண்டு தனக்கே உரிய நடையில் மிகக் கீழ்த்தரமாகப் பேசியுள்ளார். அந்த சாக்கடைப் பேச்சிலிருந்து சில வரிகள்:

> ‘‘வேலூர் டாக்டர் அரவிந்த ரெட்டியை இடப்பிரச்சினை காரணமாகக் கொலை செய்ததாகப் பத்திரிகைகள் எழுதுகின்றன. ஆனால் காவல்துறை கைது செய்த இரண்டு முஸ்லிம் தீவிரவாதிகளை ராமநாதபுரத்தில் எம்.எல்.ஏ.வாக இருக்கும் ஒரு நாய் வெளியில் விடச் செய்துள்ளது. அந்த நாய் எந்தக் கட்சி (கூட்டத்தில் இருப்பவர்கள் மனிதநேய மக்கள் கட்சி) ‘மனிதநேயத்துக்கும் உங்களுக்கும் என்னடா சம்பந்தம், மனிதர்களைக் கொல்றவங்கடா நீங்க... ராமநாதபுரத்தில் கைது செய்யப்பட்ட தீவிரவாதிகளையும் இந்த நாய்தான் விடுதலை செய்ய வைத்திருக்கிறது’’

> என்றும், இதைவிட இன்னும் கேவலமாகவும் எச்.ராஜாவின் பேச்சு அமைந்துள்ளது. தமுமுகவையும், மமக சட்டமன்றத் தலைவர் பேரா. டாக்டர் ஜவாஹிருல்லாவையும், தனிப்பட்ட முறையில் அவதூறாகவும், ஆபாசமாகவும் பேருந்து நிலையம் முன்பு பள்ளிவாசலின் அருகில் நின்று எச்.ராஜா பேசுவதை அவ்வழியாகச் சென்றுகொண்டிருந்த நகர தமுமுகவின் மக்கள் தொடர்பு அலுவலர் ஷேக் தட்டிக் கேட்டுள்ளார்.

> பாஜக மேடையின் முன்பு துணிச்சலாகப் போய் நின்று, தமுமுகவை அவதூறாகப் பேசிய ராஜாவே மன்னிப்புக்கேள், பேரா. ஜவாஹிருல்லாஹ்வை அவதூறாகப் பேசிய ராஜாவே மன்னிப்புக்கேள் என்று முழக்கமிட்டுள்ளார்.

> பாஜகவினர் அவரைத் தாக்கப் பாய்ந்துள்ளனர். உடனே காவல்துறை அதிகாரி ஒருவர் இவரை அழைத்து வந்துள்ளார்.

> இதோடு சென்றுவிடாமல், பாஜகவினர் மறுபடியும் வம்புக்கு வந்துள்ளனர். அந்தப் பகுதியில் நின்று கொண்டிருந்த முஸ்லிம்களை மிகக்கேவலமாக ஏசியுள்ளனர். மாவட்டச் செயலாளர் பி.எம்.ராஜேந்திரன் செருப்பைத் தூக்கிக் காட்டியுள்ளார். மல்லேந்திரன், ஆபாச வார்த்தைகளால் ஏசியுள்ளார்.

> இது தமுமுக தொண்டர்களையும், பொதுமக்களையும் பொறுமையிழக்க வைத்துள்ளது.

> அருவறுக்கத்தக்க நடவடிக்கையில் இறங்கியவர்களுக்கு சரமாரி அடி உதைகள் விழ, பாஜக குண்டர்கள் தெருத்தெருவாக ஓடியுள்ளனர்.

> ஒரு கட்டத்தில் சுதாரித்துக் கொண்ட தமுமுகவினர், உரிய பாடம் பெற்றபிறகும் தப்பி ஓடமடியாமல் தவித்த பாஜகவினரின் உயிரைக் காப்பாற்றியுள்ளனர்.

> 50 பேர் கொண்ட பாஜகவின் குண்டர் கும்பல் இளையான்குடியில் இப்படி ஒரு பாடம் கிடைக்கும் என்று எதிர்பார்க்கவில்லை.

> மமக மாநில அமைப்புச் செயலாளர் மௌலா நாசர், மாவட்டத் தலைவர் சைபுல்லா, பொருளாளர் காஜா மற்றும் நிர்வாகிகள், கூட்டத்தினரைக் கட்டுப்படுத்தி அசம்பாவிதத்தைத் தடுத்துள்ளனர்.

> இனியேனும் அருவறுப்புப் பேச்சுகளை பாஜக கும்பல் நிறுத்திக் கொண்டால் நல்லது.

-எழில் யாசிர்

 

சென்னையை முற்றுகையிட்ட அணுஉலை எதிர்ப்பாளர்கள்: கதிகலங்கிய மத்திய மாநில அரசுகள்

தமிழக அரசே! தமிழக அரசே!

மக்களின் உயிரோடு விளையாடாதே!

திரும்பப் பெறு! திரும்பப் பெறு!

காவல்படையைத் திரும்பப் பெறு!

போடாதே! போடாதே!

பொய் வழக்குப் போடாதே!

தளர்த்து! தளர்த்து!

144 தடை உத்தரவை தளர்த்து!

இழுத்து மூடு! இழுத்து மூடு!

அணுஉலையை இழுத்து மூடு!

& விண்ணதிரும் கோஷம், உணர்ச்சிப் பெருக்குடன் குழுமிய கூடங்குளம் அணுஉலை எதிர்ப்பாளர்களின் சட்டமன்ற முற்றுகைப் போராட்டத்தால் சென்னை கடந்த 29.10.2012 அன்று ஸ்தம்பித்தது.

கூடங்குளம் அணுஉலையை மூடக்கோரியும், கடந்த செப்டம்பர் 10ம் தேதி தமிழக காவல்துறை நடத்திய அரச பயங்கரவாதத்தைக் கண்டித்தும், அணுஉலை எதிர்ப்பாளர்களின் மீது போடப்பட்ட பொய் வழக்குகளைத் திரும்பப்பெறக் கோரியும், 144 தடை உத்தரவை நீக்கக்கோரியும் - ஆபத்தான ஆறு அரசியல் கட்சிகளைத் தவிர்த்து, ஆதரவான 40 இயக்கங்கள் அக்டோபர் 29ல் சட்டமன்ற முற்றுகைப் போராட்டத்தை அறிவித்து இருந்தன.

போராட்ட அறிவிப்பு வெளியான உடன் தமிழக அரசியல் கட்சிகள் குறிப்பாக ஆளும் கட்சியான அதிமுக சற்றே மிரண்டு போனது. போராட்டத் தேதியான 29ல் நடைபெறவிருந்த வெள்ளிவிழா கொண்டாட்டங்களைத் தள்ளி வைத்து அறிவிப்பு வெளியிட்டது. மேலும் அறிவிக்கப்படாத கட்டுப்பாடுகளை விதிக்கத் தொடங்கியது. கூட்டமைப்பின் தோழர்களைத் தொடர்புகொண்ட உளவுத்துறையினர் போராட்டக்காரர்களின் வியூகங்களை அறிந்து கொள்ள பெரிதும் மெனக்கெட்டனர்.

சட்டமன்ற முற்றுகைப் போராட்ட அறிவிப்பு வெளியான உடன் வழக்கம்போல மமகவினர் களத்தில் மக்களை ஒருங்கிணைக்கத் தொடங்கினர். வீதியெங்கும் மமகவினர் மக்கள் உரிமையில் வெளியான அணுஉலை குறித்த செய்தியினை மறுபிரசுரம் செய்து பொதுமக் களைப் போராட்டத்திற்கு ஆயத்தப்படுத்தினர். வெகுஜன ஊடகங்களும் தங்கள் பங்குக்கு மக்களிடம் போராட்டச் செய்தியைக் கொண்டு சென்றது. வார இதழான குமுதம் ரிப்போர்ட்டர், மமகவினரின் போராட்ட வியூகங்களைப் பட்டியலிட்டு, சட்டமன்றப் போராட்டத்தை மமக தலைமையில் எழுச்சியுடன் எதிர்ப்பாளர்கள் திரள உள்ளதை எடுத்துக்காட்டியது.

இந்த பரபரப்பின் எதிரொலியாய் போராட்டம் நடந்த எழும்பூர் இராஜரத்தினம் மைதானத்தில் பல்வேறு காட்சி ஊடகங்களும், நேரடியாக ஒளிபரப்பு செய்ய குவிந்திருந்தனர்.

மாற்று அரசியலை முன்னெடுத்து, அநீதிக்கு எதிராய் ஆர்ப்பரிக்கும் மனிதநேய மக்கள் கட்சியின் தொண்டர்கள் குவியத் தொடங்கினர். போராட்டப் பதாகைகளையும், கொடிகளையும் கையில் ஏந்தி, போராட்டக் களத்திற்கு வருகை தந்தவண்ணம் இருந்தனர்.

மனிதநேய மக்கள் கட்சியின் சட்டமன்ற கட்சித் தலைவர் முனைவர் எம்.ஹெச். ஜவாஹிருல்லாஹ் எம்.எல்.ஏ. தலைமையில் தமுமுக மாநில துணைத் தலைவர் குணங்குடி ஆர்.எம்.அனிபா, மமக ஆம்பூர் சட்டமன்ற உறுப்பினர் அஸ்லம் பாஷா, வடசென்னை மாவட்டத் தலைவர் உஸ்மான் அலி, செயலாளர் கள் தமீம், நவீன், துணைச் செயலாளர் முஹம்மது யாசீன் உள்ளிட்ட மமகவினரும், தென்சென்னை மாவட்டத் தலைவர் சீனிமுஹம்மது, பொருளாளர் நாசர், அன்சாரி, கோரி உள்ளிட்ட மமகவினரும், காஞ்சி வடக்கு மாவட்டத் தலைவர் யாகூப், மமக செயலாளர் சலீம் மற்றும் தொண்டர்கள், காஞ்சி தெற்கு மாவட்டத் தலைவர் ஷாஜஹான் தலைமையில் தொண்டர்களும், திருவள்ளூர் மேற்கு மாவட்டத் தலைவர் ஹாரூண் ரஷீத், பொருளாளர் ஷேக் தாவூத், மமக இளைஞர் அணி செயலாளர் அமீர்கான் மற்றும் தொண்டர்கள், திருவள்ளூர் கிழக்கு மாவட்டத் தலைவர் அப்துல் காதர், செயலாளர் புழல் ஷேக், பொருளாளர் உசேன் அலி, துணைச் செயலாளர் ஸ்டீல் மீரான், புழல் பஷீர், அப்துல் சமது உள்ளிட்ட கழக முன்னணியினரும் போராட்டக் களத்தில் குவிந்தனர்.

காவல்துறையின் கட்டுப்பாடுகள், சென்னை நகரின் போக்குவரத்து நெரிசலையும் மீறி ஆயிரக்கணக்கான மமகவினரும் ஏனைய அமைப்புகளின் தோழர்களும் போராட்டக் களத்தில் குவிந்தவண்ணம் இருந்தனர். ஆங்காங்கே காவல்துறை, போராட்டக் களத்திற்கு வருகைதரக்கூடிய தொண்டர்களைத் தடுத்து நிறுத்தி, கைது செய்து, கூட்டத்தைக் குறைக்க குறுக்கு வழிகளைக் கையாண்டது. முன்னெச்சரிக்கை நடவடிக்கையாக அமைப் புகளின் மாநில நிர்வாகிகள் கைது செய்யப் பட்டனர்.

மமக அமைப்புச் செயலாளர் ஈரோடு பாரூக் முன்னெச்சரிக்கை நடவடிக்கையாக 28.10.2012 அன்று கைது செய்யப்பட்டார். திருத்தணி நகர செயலாளர் இக்பால் மற்றும் திருவள்ளூர் நகர மமக செயலாளர் நசீர்கான், பொருளாளர் அலி தலைமையில் புறப்பட்ட கழகத்தின் செயல்வீரர்கள் முன்னெச்சரிக்கையாக பல்வேறு இடங்களில் கைது செய்யப்பட்டனர். இது போல் தமிழகமெங்கும் நூற்றுக்கணக்கானோர் கைது செய்யப்பட்டனர்.

போராட்டத் துளிகள்:

போராட்டம் நடைபெற்ற எழும்பூர் பகுதியைச் சுற்றிலும் காவல்துறை பாதுகாப்பு அரண் அமைத்திருந்தது. போராட்டக்காரர்களை ஒடுக்க சென்னையின் -நுழைவுப் பகுதிகளில் தற்காலிக செக்போஸ்ட் அமைத்து தீவிர சோதனைகளை காவல்துறை மேற்கொண்டது.

போராட்டம் குறித்த சுவரொட்டிகளை அச்சடிக்கக்கூடாது என வாய்மொழி உத்தரவாக சென்னை மற்றும் சுற்றுவட்டார அனைத்து அச்சக அதிபர்களை அன்பாக(?) அறிவுறுத்தியது காவல்துறை.

போராட்டம் நடந்த பகுதியில் காலை 6 மணியளவில் இருந்து காவலர்களை அதிக அளவில் குவிக்க ஆரம்பித்தது அரசு. போராட்டக்காரர்களை கைது செய்ய மாநகரப் பேருந்துகள் தயார் நிலையில் இருந்தன. அதிக அளவு தொண்டர்களை சமாளிக்க முடியாமல் காவல்துறைப் பேருந்துகள் உடனடியாக வரவழைக்கப்பட்டன.

சென்னையின் இதயப் பகுதியான அண்ணா சாலை, கோட்டை சாலை, கடற்கரைச் சாலை, அண்ணா மேம்பாலம், எழும்பூர் ரயில் நிலையம் போன்ற பகுதிகளில் காவல் அரண் அமைக்கப்பட்டு தயார் நிலையில் காவல் படைகள் குவிக்கப்பட்டிருந்தன.

கண்ணீர்ப் புகை குண்டு துப்பாக்கிகளை ஏந்திய படையினரும், அதிவிரைவு படையினரும் தயார் நிலையில் நிறுத்தியிருந்தது அரசு.

அணுகுண்டையே எதிர்க்கும் ஆற்றல் பெற்றுவிட்டபோது, கண்ணீர்ப் புகை குண்டுகள் எமக்கு எம்மாத்திரம் என எதிர்ப்பாளர்கள் அலைஅலையாய் களத்திற்கு வந்தபோது, கண்ணீர்ப் புகை குண்டுகள் கோலி குண்டுகளாக மாறின.

இடம் மாறியதோ கூடங்குளம்?

தடையை மீறி, காவல் படைகளை அடக்குமுறைகளைத் தாண்டி அரச பயங்கரவாதத்தை எதிர்த்து, சொந்த மக்களை காவு கொடுத்துவிட்டு, ஏகாதிபத்தியத்திற்கு வால்பிடிக்கும் மத்திய, மாநில அரசுகளுக்கு எதிராய் போராட்டக்காரர்கள் தடையை மீறி சட்டமன்ற முற்றுகையைத் தொடங்கினர். போராட்டக்காரர்கள், எழும்பூர் ராணி மெய்யம்மை திருமண மண்டபம் அருகில் தடுப்புகளை வைத்து முன்னேற விடாமல் தடுத்து கைது செய்தது காவல்துறை. மிகச்சரியாக பிற்பகல் 1 மணியளவில் தொடங்கிய கைதுப் படலம், மதியம் 3 மணி வரை நீடித்தது.

அடக்குமுறைக்கு எதிராக, ஒடுக்கப்பட்டோரின் குரலாகத் திரண்ட மக்களை காவல்துறை கைது செய்து அணி அணியாக வாகனங்களில் ஏற்றி அழைத்துச் சென்றது. வெகுஜன மக்களின் தொண்டர்களையும், மக்கள் தலைவர்களையும் ஒன்றாக சிறையில் அடைத்தால் போராட்டம் இன்னும் வீரியமும், வளர்ச்சியும் அடையும் எனக் கருதி தனித்தனி மண்டபங்களில் அடைத்தது காவல்துறை.

கூடங்குளம் சென்னைக்கு இடம் மாறியதோ என்ற அளவில் பல்லாயிரக்கணக்கான அணுஉலை எதிர்ப்பாளர்கள் கைது செய்யப்பட்டு அன்று மாலையில் விடுவிக்கப்பட்டனர்.

போராட்டம் குறித்து கருத்து தெரிவித்த முனைவர் எம்.ஹெச். ஜவாஹிருல்லாஹ், ஆங்கிலத்தில் ஓர் சொற்றொடர் உண்டு ‘‘When the First Ball Bowled, the Match was Won’’ அதுபோன்று போராட்டம் அறிவித்த நாளில் நடைபெறவிருந்த சட்டமன்றக் கூட்டத்தை வேறு தேதிக்கு மாற்றிக் கொண்டார்கள். அது எங்களுக்கு கிடைத்த வெற்றி. எங்கள் கூட்டமைப்பின் தோழர்களை முன்னெச்சரிக்கையாக கைது செய்து போராட்டத்தை அச்சுறுத்த முயன்றார்கள். ஆனால் இங்கு குழுமியுள்ள பல்லாயிரக்கணக்கான மக்கள், கூடங்குளம் மக்களின் அறவழிப் போராட்டத்திற்கு ஆதரவாக குழுமியிருக்கிறார்கள். போராட்டத்தை அடக்க நினைக்கும் மக்கள் விரோத அரசுகளின் கனவு பலிக்காது. கூடங்குளத்தை இழுத்து மூடும் வரை ஓயமாட்டோம், உறங்கமாட்டோம்” என்றார்.

ஆம் திணறியது சென்னை! தலைநகருக்கு இடம்மாறியது இடிந்தகரை!

நகர்வலம்

கோஷங்களை எழுப்பிய வண்ணம் தடையை மீறி சட்டமன்ற முற்றுகைப் போராட்டத்தைத் தொடங்கிய மதிமுக, மமக, வி.சி. என வெகுஜன மக்கள் இயக்கத் தொண்டர்களைக் கைது செய்து வாகனங்களில் ஏற்றிய காவல்துறை, கைதானவர்களை அடைத்துவைக்க மண்டபங்கள் இல்லாமல் சென்னை நகரைச் சுற்றி வந்தனர்.

முனைவர் எம்.ஹெச். ஜவாஹிருல்லாஹ், குணங்குடி ஆர்.எம்.அனிபா உள்ளிட்ட ஆயிரக்கணக்கான மனிதநேய மக்கள் கட்சி தொண்டர்கள் போராட்டப் பகுதியில் கைது செய்யப்பட்டு நீண்டநேரம் அலைக்கழிக்கப்பட்டு மண்டபங்களில் தங்கவைக்கப்பட்டனர்.

மே 17 இயக்கத்தினரின் பதாகைகள் பெரிதும் கவர்ந்தன.

மனிதநேய மக்கள் கட்சியின் எழும்பூர் பகுதி நிர்வாகிகள் ஜாஹிர், சம்சு, ரவூப் ரஹீம் ஆகியோர், சுட்டெரிக்கும் வெயிலில் போராடிய போராளிகளுக்கு தாகம் தீர்க்க குடிநீர் பாக் கெட்டுகளை வழங்கினர்.

போராட்டம் தொடங்கும் முன்பே

தலைகளை எண்ணிப் பார்ப்பவன் அரசியல்வாதி; எதிர்காலத் தலைமுறை களுக்கான பணி செய்பவன் சமூகவாதி. சமுதாய மக்களின் முன்னோடியான தமுமுக, போராட்டக் களங்களில் முதன்மையானது. போராட்டம் தொடங்கும் முன்பே காலை 9.45 மணியளவில் தமுமுக மாநில துணைத் தலைவர் ஆர்.எம்.அனிபா முதன்மையாக வருகைதந்து போராட்டக்காரர்களை உற்சாகப்படுத்தினார்.

சட்டமன்றமும் மமகவும்

தமிழக சட்டமன்றம் வெள்ளி விழா காணும் இத்தருணத்தில் கடந்த பல ஆண்டுகளுக்கு மேலாக ஜனநாயக வழியில் போராடும் கூடங்குளம் மக்களுக்காக சட்டமன்றத்தில் குரலெழுப்ப எந்தக் கட்சியும் முன்வரவில்லை.

போராட்டம் தொடங்கிய நாள் முதல் அக்டோபர் 29 வரை கூடங்குளம் மக்களின் தரப்பு நியாயத்தையும், அரசின் இரட்டை நிலைபாட்டையும் அதிவேகமாக விமர்சித்து வந்துள்ளது மனிதநேய மக்கள் கட்சி.

சொந்த மக்களை வஞ்சித்துவிட்டு, ஏகாதிபத்தியத்திற்கு வால்பிடிக்கும் மக்கள் விரோத அரசுகளை அடையாளம் காட்டிய ஒரே அரசியல் கட்சி மனிதநேய மக்கள் கட்சி மட்டுமே.

ஷமீம் அஹ்மத்

கூடங்குளம் அணுஉலை விவகாரம்: தமிழக மக்கள் அறியவேண்டிய உண்மைகள்!

எம். தமிமுன் அன்சாரி

கூடங்குளம் அணுஉலைக்கு எதிராகப் போராடும் மக்களையும், உதயகுமார் உள்ளிட்ட வழிநடத்தும் மக்கள் போராளிகளையும் தேசத்துரோகிகளாகவும், தமிழகத்தில் தற்போது நிலவிவரும் மின்தடைக்கு இவர்கள்தான் காரணம் எனவும், இவர்களை சுட்டுக் கொன்றுவிட்டால் பிரச்சனைகள் தீர்ந்துவிடும் எனவும், அதன்பிறகு கூடங்குளத்தில் பணிகள் தொடங்கப்பட்டு தமிழகமே மின்வெட்டு இருளிலிருந்து மீண்டுவிடும் என்பதுபோலவும் ஒரு "மூட நம்பிக்கை' நிலவிக் கொண்டிருக்கிறது.

அனைவரும் ஓர் உண்மையைப் புரிந்துகொள்ள வேண்டும். தமிழகத்தில் தற்போது நிலவிவரும் மின்வெட்டுக்கும், கூடங்குளம் போராட்டங்களுக்கு துளியும் தொடர்பு இல்லை. இது இந்திரா காந்தி, எம்.ஜி.ஆர். காலத்திலிருந்தே சிறிதும் பெரிதுமாக நடைபெற்று வரும் ஒரு நெடிய போராட்டமாகும். கடந்த ஒரு வருடமாக இப்போராட்டம் மக்கள் எழுச்சிமிகு தொடர் போராட்டமாக மாறியிருக்கிறது. அதற்கு என்ன காரணம்?

வாழ்வுரிமை

கூடங்குளம் அணுஉலையிலிருந்து ஒன்றரை கிலோ மீட்டர் தூரத்திற்குள் 35 ஆயிரம் மக்களும், 5 கி.மீ. சுற்றளவுக்குள் ஒரு லட்சம் மக்களும் வாழ்கிறார்கள். அம்மக்களின் வாழ்வுரிமைப் போராட்டம் என்பது தென்தமிழகம், கேரளா மற்றும் அண்டை நாடான இலங்கை உள்ளிட்ட பகுதிகளில் வாழும் கோடிக்கணக்கான மக்களின் உயிர் பாதுகாப்பு தொடர்பானது என்பதை அனைவரும் புரிந்துகொள்ள வேண்டும்.

நாம் வசிக்கும் ஊருக்கு அருகில் அணுஉலை அமைக்கப்பட்டால், அதன் ஆபத்துகளை அறிந்தபிறகு அதை நாம் அனுமதிப்போமா? எதிர்ப்போமா? என்பதை தமிழக மக்கள் சிந்திக்க வேண்டும்

.

ஜப்பானும் இந்தியாவும்

ஜப்பானில் கடந்த 11.03.2011 அன்று ஏற்பட்ட பூகம்பத்தில் "புகுஷிமா அணுஉலை' பாதிக்கப்பட்டு கதிர்வீச்சு பரவியது. அறிவியல் தொழில்நுட்பத்தில் உயர்ந்த இடத்தில் இருக்கும் ஜப்பானாலேயே இதைத் தடுக்க முடியவில்லை. சுமார் 20 ஆயிரம் ஜப்பானியர்கள் இறந்திருக்கலாம் என்றும், அதை ஜப்பானிய அரசு மறைப்பதாகவும் சர்வதேச நாடுகள் குற்றம்சாட்டுகின்றன.

அணுஉலை கசிவை, விபத்தை ஜப்பான் போன்ற வளர்ந்த - வல்லமை மிக்க நாடுகளாலேயே தடுக்க முடியவில்லை எனில், இந்தியா போன்ற தேசங்களால் என்ன செய்ய முடியும்? தானே புயலால் ஏற்பட்ட சேதத்திற்கு முதலுதவி செய்யவே நமக்கு ஒரு வாரம் தேவைப்படுகிறது. அணுஉலை வெடித்தால், நமது அரசின் மீட்பு நிலை எப்படி இருக்கும் என்பதை மனசாட்சியோடு சிந்தித்துப் பார்க்க வேண்டும்.

14000 கோடியா? உயிர்களா?

14000 கோடிகளை முதலீடு செய்து அணுஉலை கட்டிய பிறகு இப்போது அதை எதிர்ப்பது நியாயமா? என சிலர் கேட்கிறார்கள். இந்த அணுஉலை அமைக்கப்பட்ட 1980களில் இதுகுறித்த விழிப்புணர்வு யாருக்கும் இல்லை. நம் பகுதிகளில் புதிய வேலைவாய்ப்புகள் உருவாகப் போகிறது, நமக்கெல்லாம் வேலைகளும், சலுகைகளும் கிடைக்கப் போகிறது என அரசின் ஏமாற்று பிரச்சாரங்களை அம்மக்கள் நம்பியிருந்தனர்.

இதுகுறித்து உதயகுமார் உள்ளிட்ட பலர் அப்போது எச்சரிக்கை துண்டுப் பிரசுரங்களை வினியோகித்தபோது அதை அம்மக்கள் எதிர்த்தனர். ஜப்பான் - புகுஷிமா அணுஉலை விபத்துக்குப் பிறகே அப்பகுதி மக்கள் தங்களுக்கு நேரப்போகும் அபாயங்களை உணர்ந்தனர். அதன்பிறகே கடந்த ஒரு வருடமாக தொடர் போராட்டங்களை மக்கள் நடத்திவருகின்றனர். உதயகுமார், புஷ்பராயன், ஏசுராஜ் போன்ற வழிநடத்தும் போராளிகளே தடுத்தாலும், அம்மக்கள் போராட்டங்களை கைவிடப் போவதில்லை என்பதே உண்மை. 14000 கோடி ரூபாய் வீணாகிறதே... என கவலைப்படும் "நல்லவர்கள் - தேசபக்தர்கள்' ஒன்றைப் புரிந்துகொள்ள வேண்டும். உங்கள் மகளுக்கு ஒரு மணமகனை நிச்சயம் செய்து, திருமணம் ஓராண்டுக்குப் பிறகு நடத்தப்படும் என முடிவெடுக்கிறீர்கள் என வைத்துக் கொள்வோம். திருமணம் நெருங்கும் தருணத்தில், மணமகனுக்கு எய்ட்ஸ் நோய் இருப்பதாகத் தெரியவருகிறது. அப்போது நிச்சயத்தை காரணம் காட்டி திருமணத்தை நடத்துவீர்களா? அல்லது ரத்து செய்வீர்களா? இதற்கு நீங்கள் தரும் பதில்தான் கூடங்குளம் போராட்டக்காரர்களின் கேள்விகளுக்கும் பொருந்தும்.

அணுஉலை மூலம் அதிக மின்சாரம் கிடைக்குமா?

இந்தியாவில் நிறுவப்பட்டுள்ள மின் நிலையங்களில் நிலக்கரி, வாயு, எண்ணெய் போன்றவற்றை உள்ளடக்கிய அனல்மின் நிலையங்களிலிருந்து 65.10 சதவீதமும், புனல்மின் நிலையங்களிலிருந்து 21.22 சதவீதமும், சூரிய ஒளி, காற்றாலை போன்றவற்றிலிருந்து 11.05 சதவீதமும் மின்சாரம் தயாரிக்கப்படுகிறது. அதேசமயம், அணுஉலைகளி-ருந்து மொத்தமே 2.36 சதவீத மின்சாரத்தை மட்டுமே பெறப்படுகிறது.

கூடங்குளத்தில் அணுஉலை இயக்கப்பட்டால் மொத்தமாக 15 நிமிடங்களுக்குத் தேவையான மின்சாரம் மட்டுமே கிடைக்கும். இந்த உண்மைகளை மத்திய மாநில அரசுகள் மறைக்கின்றன.

மின்சார உற்பத்தியைப் பெருக்க அணுஉலைகளுக்கு பதிலாக கடல் அலை, நதிகள், அருவிகள், காற்றாலை, சூரிய ஒளி ஆகிய இயற்கை துறைகளிலிருந்தும் - தொழில்நுட்பங்களிலிருந்தும் தயாரிக்க முடியும். அதை அரசு ஏன் செய்ய மறுக்கிறது?

அறிவியல் தொழில்நுட்பத் துறையில் வளர்ந்த நாடுகளான ஜெர்மனி போன்ற பல நாடுகள் கூடங்குளத்தில் இருப்பது போன்ற அணுஉலைகளை தங்கள் நாட்டில் அனுமதிப்பதில்லை. அமெரிக்காவும், ஜப்பானும் புதிதாக அணுஉலைகளை தங்கள் நாடுகளில் நிறுவ தடை விதித்துவிட்டன.

உலக யுரேனியத்தில் 23 சதவீதத்தை தன்னகத்தே வைத்திருக்கும் ஆஸ்திரேலியா, தனது நாட்டில் இதுவரை ஒரு அணுஉலையைக் கூட கட்டவில்லை.

தற்போது ரஷ்யாவின் துணையோடு கூடங்குளத்தில் அமைந்துள்ள அணுஉலை என்பது வி.வி.ஐ.ஆர். வகையைச் சார்ந்ததாகும். இந்த வகை அணுஉலைகள் கடற்கரைப் பகுதிகளில் இதுவரை அமைக்கப்பட்டதில்லை. ரஷ்ய பொறியாளர்களுக்கு இதில் முன் அனுபவமும் இல்லை. அதைவிட கவனிக்கத்தக்கது, இந்த வகை அணுஉலைகளின் குளிர்விக்கும் கலன்கள் முதல்முறையாக கடல்நீரைக் கொண்டு பரிசோதிக்க இருக்கின்றன.

நாம் கேட்பது என்னவெனில், தூத்துக்குடி, நெல்லை, கன்னியாகுமரி மாவட்ட மக்கள் என்ன, பரிசோதனை எலிகளா? உலகிலேயே இவர்கள்தான் ஊருக்கு இளைத்தவர்களா?

ஜப்பானில் புகுஷிமா அணுஉலை விபத்து நடந்தபிறகு, ரஷ்ய அணுஉலைகளின் தரத்தை ஆராய ஒரு குழுவை அமைத்தார் ரஷ்ய ஜனாதிபதி திமித்ரி மெத்வதேவ். அக்குழு, "சக்திவாய்ந்த புகுஷிமா ஜப்பானிய அணுஉலை விபத்துகளைத் தாக்குப்பிடிக்கும் அளவுக்கான வலிமை ரஷ்ய அணுஉலைகளுக்கு இல்லை' என அறிக்கை சமர்ப்பித்து விட்டது.

ரஷ்யாவில் "செர்னோபிலில்' தான் 1986 ஜூன் மாதத்தில் கதிர்வீச்சு வெளியேறி 30 கிலோ மீட்டர் சுற்றளவில் வாழ்ந்த மக்கள் பாதிக்கப்பட்டார்கள். இதில் 9 முதல் 10 லட்சம் பேர் வரை உயிரிழந்ததாக கூறப்பட்டது. இது ஹிரோஷிமா, நாகசாகியில் அமெரிக்கா வீசிய அணுகுண்டுகளை விட நூறு மடங்கு ஆபத்துகளை ஏற்படுத்தியது.

ரஷ்யாவின் துணையோடு அமைக்கப்பட்டுள்ள கூடங்குளம் அணுஉலைகள், புயல், சுனாமி, பூகம்பம் ஏற்படும் வாய்ப்புள்ள புவிக்கோட்டில் அமைந்துள்ளதை நினைவில் கொள்ளவேண்டும்.

தேசத்துரோகிகள் யார்?

கூடங்குளத்தில் அமைக்கப்பட்டுள்ள இந்த அணுஉலைகள் முதலில் கேரளாவில்தான் அமைக்க திட்டமிடப்பட்டன. கேரள அரசும், மக்களும் விழித்துக் கொண்டதால் அது தமிழகத்தின் தலையில் கட்டப்பட்டுள்ளது.

"அணுஉலைகளை எங்கள் மாநிலத்தில் அனுமதிக்க மாட்டோம்' என மேற்குவங்க முதல்வர் மம்தா பானர்ஜி அறிவித்துவிட்டார்.

மலையாளிகளுக்கும், வங்காளிகளுக்கும் உள்ள சமூகப் பொறுப்புணர்வு தமிழர்களுக்கு இல்லையா? உதயகுமார் போன்றவர்கள் தேசத்துரோகிகள் என்றால் கேரள, மேற்குவங்க அரசியல் தலைவர்கள் எல்லாம் யார்?

அமெரிக்கா - ரஷ்யாவின் செல்லப் பிள்ளைகளான மன்மோகன் சிங்கும், மான்டேக் சிங் அலுவாலியாகவும் யார்? மக்களுக்காகப் போராடும் உண்மையான தலைவர்களை எதிர்கால வரலாறு விளக்கத்தான் போகிறது.

அனைவரும் மதிக்கும் அப்துல் கலாம், கூடங்குளம் அணுஉலையை ஆதரிக்கிறாரே...? எனலாம்.

அப்துல் கலாம் ஒரு அரசாங்க பிரதிநிதி. அவர் ஒரு ஏவுகணை விஞ்ஞானி தானே தவிர அணு விஞ்ஞானி அல்ல. அவரை நாமும் மதிக்கிறோம். ஆனால் தினமும் இலங்கை ராணுவத்தால் சுட்டுக் கொல்லப்படும் தமிழக மீனவர்களுக்காகவோ, தீண்டாமையால் அவதிப்படும் தலித்துகளுக்காகவோ, கலவரங்களால் பாதிக்கப்படும் சிறுபான்மையினர்களுக்காகவோ என்றைக்காவது ஐயா அப்துல் கலாம் குரல் கொடுத்திருக்கிறாரா? என்பதையும் கேள்விகளாக முன்வைக்கிறோம்.

காந்தியின் அகிம்சை வழிப் போராட்டத்தை வரவேற்றவர்கள் கூட நேதாஜியின் நியாயங்களையும் ஏற்றார்கள் என்பதை "அறிவுஜீவிகள்' புரிந்துகொள்ள வேண்டும்.

அப்துல் கலாம் அவர்கள் இவ்விஷயத்தில் மக்களின் பக்கம் நிற்காமல் அரசு பக்கம் நிற்பது துரதிர்ஷ்டவசமானது, வருந்தத்தக்கது.

அணுமின் நிலையங்களின் உண்மை நிலை

இதுவரை இந்தியாவில் அமைக்கப்பட்ட அணுஉலைகள் எதுவும் நிர்ணயிக்கப்பட்ட இலக்கை எட்டவில்லை. அவற்றைப் பாதுகாக்கவும், பராமரிக்கவும்தான் செலவுகள் பன்மடங்காகின்றன.

இன்னும் பல புதிய அணுஉலைகளைக் கட்டினாலும், 2050ல் கூட அணுஉலைகளின் மூலம் 5 சதவீத மின்தேவையைக் கூட எட்ட முடியாது என்பதே உண்மை.

உண்மையில் அணுஉலைகளில் மின்சாரம் தயாரிக்கப்படுகிறதா? அல்லது மின்சாரம் என்ற பெயரில் அணுகுண்டுகள் தயாரிக்கப்படுகிறதா? என்பதை அரசுதான் விளக்க வேண்டும்.

மக்களே... சிந்திப்பீர்...

அணுஉலைகளில் கசிவு என்பது தவிர்க்கவே முடியாததாகும். அவற்றின் கழிவுகளைப் பாதுகாப்பதும், பராமரிப்பதும் அவ்வளவு எளிதல்ல. அது சேதமடைந்தால் அணுகுண்டுகளினால் ஏற்படும் பேராபத்தை விட மோசமாக இருக்கும்.

அப்பகுதிகளில் கடல்நீர் பாதிக்கப்பட்டு மீன் உள்ளிட்ட கடல் வாழ் உயிரினங்கள் அழியும். உணவு, குடிநீர், காற்று மாசுபடும். சுற்றுச்சூழல் கெடும். புற்றுநோய் பரவுவது தவிர்க்க முடியாதது என்றெல்லாம் உலக அனுபவங்கள் கூறுகின்றன. விஞ்ஞானிகளும் எச்சரிக்கிறார்கள்.

1984ல் மத்தியப் பிரதேச தலைநகர் போபாலில் "யூனியன் கார்பைட்' என்ற அமெரிக்க நிறுவனத்தில் விஷவாயு கசிந்ததில் ஆயிரக்கணக்கானோர் இறந்ததையும், இன்றுவரை அங்கு குழந்தைகள் ஊனமுற்றும், புற்றுநோயோடும் பிறப்பதையும் பார்க்கும் போது நெஞ்சம் வெடிக்கிறது.

பாதிக்கப்பட்டவர்களுக்கு முறையான இழப்பீடுகள் இல்லை. இந்திய அரசு நம் மக்களை மறந்துவிட்டு, அமெரிக்க கம்பெனிக்கு ஆதரவாக இன்றுவரை செயல்படுவதைப் பார்த்தபிறகும், நீங்கள் கூடங்குளம் போராட்டத்தை எதிர்த்தால் அது உங்கள் மனசாட்சியைக் கொல்வதாகவே இருக்கும்.

நமக்கு மின்சாரம் வேண்டும்! ஆனால் மக்களை அழித்து சுடுகாட்டில் விளக்குகள் எரியவேண்டாம்!

வெளியீடு

மனிதநேய மக்கள் கட்சி.